euskal diaspora eta kultura
2010/08/03
Argentinako azken krisialdi ekonomikoan, 2001ean, heldu zen Jose C. Paz-era Oñatitik bidalitako lehenengo kontainerra. Berrogeita hamar kutxa zetozen, miseria gorrian bizi zen jendearen artean behar-beharrezko gauzak banatzeko. Geroztik, urtero heltzen da Buenos Aires probintzian dagoen hirira herri gipuzkoarretik bidalitako laguntza; laguntza horri esker, Jose C. Pazeko hainbat tailerretan lan egiteko tresnak daude, eta hainbat aterpetxetako neska-mutilek badute janzteko moduko arropa, eta otorduak egiteko leku bat. “Senidetzea, arrazoi historikoengatik egin zen, hiriko sortzailea Oñatikoa baitzen. Gero jakin genuen zein zen Jose C. Pazeko egora ekonomikoa eta oñatiarrok berehala antolatu ginen laguntza emateko”, azaldu zion EuskalKultura.com-i senidetzearen taldeko koordinatzaile eta 'Hermansoloña' Gobernuz Kanpoko Erakundeko arduradunetako bat den José Antonio Urteagak. Hamar urte pasatu dira jadanik bi herri hauen arteko harremana sortu zenetik eta urtemuga ospatzeko, Maria Angeles Oñederra, Jose C. Paz-eko Toki Eder Euskal Etxeko lehendakaria, Oñatira bidaiatu zen hango kideekin elkartzeko.
2010/08/03
Uztaila bukatu aurretik, Buenos Airesko Ekin, Eusketxe eta Euskaltzaleak-en egoitzan ere ospatu zen San Fermin Jaia. Aurten etxeko dantzariek hartu dute festa antolatzeko ardura, esan nahi baita Ekin Dantzari Taldeak. Aitor Alavaren gidaritzapean, hamazazpi kidek osatzen dute gaur egun dantza talde hori; eta euren etxean gauzatzen diren jaiak alaitzeaz gain, beste euskal etxeen gonbiteak ere jasotzen dituzte sarritan dantzariek, beste hainbat herritan dantza egiteko. Joan den 24an, ordea, Buenos Airesen bertan geratu ziren Nafarroako jairik garrantzitsuaren giroa Argentinako hiriburuan pizteko. Eurak prestatutako bideo batez eta dantza tipikoak lagun gozatu ahal izan zuten festaratutako lagun guztiek.
2010/08/02
Igande gauez bukatu da Boisen Jaialdi 2010. Ohiko beroa lagun --edo ez gehiegizko etsai-- egunez egun elkarretaratze honetaz jasotako iritzi eta iruzkinak positiboak izan dira oso. Aurten inoiz baino jende gehiago bildu da Euskal Herritik, eta hori nabaritu izan da joan den astean zehar hiriko 'Basque Block' delakoan present egon den giro eta bizitasunean. Bertakoak ere ez dira atzean gelditu ordea. Ostegunean, programak ekitaldi bereziak baitaratzen zituen, musika eta animazioa bildurik, eta asteko azken hiru egunetan euskal giroak Boiseko hiria harrapatu zuen. Hainbati entzun izan dizkio lerro hauek idazten ari denak, 'Euskal Herriko herri bateko jaietan banengo bezala sentitzen naiz' eta antzeko esaldiak, esataria Euskal Herritik etorritako zein Ameriketako beste edozein bazterretatik etorritako euskalduna izanik.
2010/08/02
Euskaltzaindiaren Herri Literatura Batzordeko buru izan zenaren omenezko liburua argitaratu eta ipini du Euskaltzaindiak sarean, interesa izan dezaketen guztien eskura. Juan Mari Lekuonak ahozko euskal literaturaren inguruko lan ugari argitaratu zituen; oraingoan, ikertzaile adiskide eta ikasle izan zituen hainbat egilek, apaiz oiartzuarra gogoan harturik, harek hain gogoko izan zuen gaiari buruzko artikuluak idatziz osatu dute liburu hau, paperean zein pantailan irakur daitekeena.
2010/08/02
Joan den ostiralean hasi eta datorren igandera arte luzatuko da, uztailaren 30etik abuztuaren 8ra arte, Quebec-eko Trois-Pistoles herrian dagoen 'Parc de l'Aventure basque en Amérique' (Ameriketako Euskal Abenturaren Parkea) delako museo biziak urtero antolatzen duen euskal jaialdi eta astearen 12. edizioa. Pilota ikastaro bat eta txapelketa, arte erakusketa, euskal sukaldaritza dastatzea, kirolen eta indar erakusketa, pintura tailerra, haurrentzako ekintaldiak eta gehiago dauzka osagai, euskal dantzak eta Ezpeletako txaranga ere protagonista izango dituen jaialdiak.
2010/07/30
Hirugarren urtez, La Platako Unibertsitate Nazionalak (UNLP) Euskara eta Euskal Kultura ikastaroa antolatu du eta garatzen ari da aurten. Bertan parte hartu dutenek giro bikainean egindako afari batekin agurtu zuten ikastaroaren lehenengo zatia. Neguko etenaldia egingo duten arren, abuztu bukaeran berriro ekingo diete eskolei.
2010/07/30
Ukaezina da gaur egungo euskal etxeek euren komunitateetan duten presentzia. Duela ehun urte, Euskal Herritik etorritako familiak elkartu eta babesteko helburua zuten erakunde hauek eta horregatik batzuetan itxi samarrak izan zitezkeen. Egun, ordea, euskal etxe gehienen joera erabat kontrakoa da: gizarte baten zati bat dira eta gizarte horietan integrazio prozesua naturala da oso. Hainbat herritan eraikitako euskal plazak honen adibide bikainak dira: Rosario, Trenque Launquen, Tres Arroyos eta José C. Paz, batzuk aipatzearren. Orain Cordoba probintziako Rio Cuartok ere bere euskal berdegunea izango du, hiriko Juan Filloy Zubiaren hegoalde sarrera ondoan, hain zuzen. Plazaren Inaugurazio ofíziala eta lehenengo harria jartzeko ekitaldia gaur bertan izango da, arratsaldeko 4:30etan. Zeremonian, probintzia eta hiriko agintariek baita “Gure Ametza” Euskal etxeko kideek ere hartuko dute parte.
2010/07/30
Joan den urtean Txileko hiriburuan, baita Viña del Mar-en ere, aurkeztu ziren Astigarragako Aire-Aire trikitixa taldeko neskak eta esperientzia horrek animatu zituen Hego Amerikara berriz ere etortzera. Uztailaren lehenengo astean eta Ipar hemisferioko udako oporrak aprobetxatuz, Susana Aurkiak (taldeko zuzendaria), Jaione Castrillok, Amaiur Alkain, Mari Jose Merketegi, Naroa Aierben, Arantxa Etxebeste eta Argoitz Otañok osatutako taldeak Ozeano Atlantikoa zeharkatu zuen bigarren aldiz euren musika eta dantzak Argentinako euskal etxeetara ekartzeko. Taldea La Platako Euzko Etxean, Buenos Airesko Euskaltzaleak-en eta Gral. Rodriguez-eko Eusko Aterpea Euskal Etxean aurkeztu zen euskaldun argentinarren artean Euskal Herriko erromeria tradizionalaren giroa piztuz.
2010/07/30
Oñatirekin senidetuta dagoen Argentinako José C. Paz herriaren baitan hainbat familien artean topatzen den pobrezia egoerari aurre egiteko, Hermansoloña Gobernuz Kanpoko Erakundea (GKE) sortu zen iaz herri gipuzkoar honetan. Orain, hirugarren herri senidetu baten laguntza jaso du ekimenak, Chateaubernard herri frantsesa, Argentinara merkantzia elkarrekin bidali ahal izateko.
2010/07/30
Santiagoko Euzko Etxeak datorren igandean hiriburu txiletarrean ospatuko den ekitaldirako gonbidapena luzatu dio bertako euskal komunitateari. San Inazio Loiolakoaren jaieguna ospatuko dute, Diasporako leku batzuetan, tartean Txilen, 'Iñaki Deuna' bezala ezagutzen den festa. Katedral Metropolitarrean eskainiko den mezarekin ekingo zaio egunari, Santiagoko Euzko Etxeko Euskal Abesbatza partaide. Folklore erakustaldi bat ere antolatu da Arma Plazan, ostean Vicuña MacKennako egoitzan bazkari batek eta bestjai giroko beste zenbait ekitalditan parte hartzeko aukerarekin.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
