euskalkultura.eus

Buenos Aires, Argentina. Argentinako hiriburuko Udala deitzaile eta sustatzaile, abuztuaren 26an gauzatu zen aurten Buenos Aires celebra el País Vasco (Buenos Airesek Euskal Herria ospagai) jaialdia. Laurak Bat euskal etxeak antolaturik, eta hainbat euskal etxe eta euskal erakunderen engaiamenduarekin, erakustaldia egun hartako eguerdiko 12tik iluntzeko 6ak arte luzatu zen. EuskalKultura.com-ek orduan ere eskaini zituen irudien osagarri, hona hemen euskal txoko, txosna eta agertokien arteko argazki ibilbide berri bat:

[Eguraldia gora behera, Buenos Aires hiriak ‘baietz’ esan zion berriro ere euskal gizataldeari eta lagun mordoak bisitatu zuen erakustaldia. Egun osoan zehar, kalitate handiko ikuskizunez gozatu ahal izan zuten Mayo Etorbidera bertaratu ziren buenosairestarrek (argazkia BA Celebra Al País Vasco)]

[Mota askotako ikuskizunak eskaini zizkieten antolatzaileek bisitariei. Tartean, euskal musika egiten duten talde argentinarrenak. Jaialdiko agertoki nagusian Lagun Onak abesbatza, eta Ixilik, Baietz eta Maral musika taldeek Euskal Herriko soinu eta doinuak ekarri zituzten Buenos Airesko erdigunera (argazkia BA Celebra Al País Vasco)]

[Euskal jai gehienetan bezala, dantzariek ere izan zuten Euskal Herriko kultura zer den erakusteko ardura. Dantzek, kalean zein taula (edo kaxa) gainean, liluratu egin zuten publikoko jendea (argazkia BA Celebra Al País Vasco)]

[Euskal Herriko zortzigarren lurraldea Diaspora bada, ‘Buenos Airesek ospatzen du’ festa zortzigarren lurralde horren ikurra bihurtu zen abuztuaren 26an. Mayo Etorbidean kokatuta zeuden standetan, Euskal Herriko kultur arlo guztietako informazioa eskuratu ahal izan zen, tartean, euskara, genealogia, argitalpenak, hezkuntza, gizarte laguntza, turismoa, irratia eta erakundeei buruz. Txikiek ere izan zuten ondo pasatzeko leku berezi bat (argazkia BA Celebra Al País Vasco)]

[Euskal tradizio eta kulturaz ari bagara, ezin kirolak kanpoan utzi: ez kirol tradizionalenak ezta urteen poderioz tradizional bilakatu direnak ere (argazkia BA Celebra Al País Vasco)]

[Euskal musika entzuteaz gain, jaialdian parte hartu zutenek euskal musika tresnak ikusi eta ukitzeko aukera ere izan zuten. Jendeari interes handia piztu zion ehunka urte dituzten piezak ezagutzeak (argazkia BA Celebra Al País Vasco)]

[Eta euskal jaia ez litzateke seguruenik ez ‘euskal’ ezta ‘jaia’ ere izango janaririk gabe. Gainera, euskal sukaldaritzako plater tipikoenak -bero beroak- oso ondo sartu ziren neguko arratsalde hotzean (argazkia BA Celebra Al País Vasco)]

[Dastatzen ez ezik, euskal errezetak prestatzen ere aritu zen publikoa izen handiko Itziar Aguirre eta Borja Blazquez sukaldarien eskutik (argazkia BA Celebra Al País Vasco)]

[Erraldoi eta buruhandiek lagundu zituzten chefak ‘sukaldeko’ betebeharretan (argazkia BA Celebra Al País Vasco)]

[Jai giroa gailendu bazen ere, Euskal Herriko egoera politikoaz ziharduen lekurik ere muntatu zen eta aldarrikapenak ere entzun edo irakurri ziren (argazkia BA Celebra Al País Vasco)]

[Jaiari amaiera emateko, zuriz, berdez eta gorriz ‘margotu’ zuten etorbideko airea milaka eta milaka papertxo hegaltatuek. Dantzan eta abesten agurtu zuten aurten ere Buenos Aires hiria bildutako euskaldunek (argazkia BA Celebra Al País Vasco)]