euskalkultura.eus

Sao Paulo, Brasil. Jose Francisco 'Kinku' Zinkunegi, HABEren Euskara Munduan programaren koordinatzailea, Brasilen izan da eta Eusko Brasildar Etxea bisitatu zuen iragan larunbatean Sao Paulon, elkarteko presidente Oskar Goitiak EuskalKultura.com-i azaldu dionez. Presidente izateaz gain, elkarteko euskara irakaslea ere bada Goitia, Karol Salazarrekin batera. Bi irakasleak Euskara Munduan programaren barruan trebatu dira, 2008-2012 lau-urtekoan.

Zinkunegi Goitia eta Salazarrekin bildu zen, elkartearen euskara eskolei buruzko bilera egiteko. Irakasleek euskal etxeak eskola hauek emateko prestatu dituen instalazio berriak erakutsi zizkioten. Aipagarria da euskal etxean ematen diren eskolez gain, elkarteak beste ikastaro batzuk ere ematen dituela Tremembé-ko Kultur Etxean eta Casa de España erakundean.

Goitiak azaldu duenez, Zinkunegi pozik agertu zen euskal etxea euskara irakaskuntza arloan egiten ari den lanarekin eta, are gehiago, azken urtean elkarteak jauzi kualitatibo handia egin duela esan zuen. Ondoren, 2012-2013 ikasturterako plangintza adostu zuten. Bileraren ostean, Eusko Brasildar Etxeak plaka oroigarri bat eman zion Zinkunegiri, Brasilen euskararen zabalkuntzan eskaini dien laguntzarengatik. 

Brasildik Txilera abiatu da HABEko teknikari zen teknikaria eta atzo Jaurlaritzaren ordezkariarekin eta Santiagoko Euzko Etxea elkarteko zuzendaritza eta euskara irakasleekin bildu zen. Gaur Valparaisoko Euzko Etxea eta Colectividad Vasca de Chile elkarteekin bilera egingo du.

Bihar eta etzi Uruguaien izango da Zinkunegi eta FIVUrekin, Euskal Erria, Saltoko Euskal Etxea eta Centro Euskaro elkarteeekin bilduko da. Ostiralean Argentinara helduko da HABEko teknikaria eta FEVA federazioarekion eta Euskal Echea elkartearekin egingo du topaketa. Azkenik, asteburuan euskara egiaztatze-frogak egingo dira Buenos Airesen; ahozko froga eta froga idatzia, hurrenez hurren.