euskalkultura.eus

Villa María, Argentina. Villa Mariako Euzko Etxea-k antolatutako Euskal Zinema Ziklo hau euskal elkarte horren egoitzan (Lisandro de la Torre 33) gauzatuko dira, hilean behin, asteazkenez, gaueko hamarretan beti. David Azumendi koordinatzaile, Alex de la Iglesiaren filmografiaren errepasoa egingo da. Zikloko lehenengo saioa, 'Piztiaren eguna' (1995), anti-Kristoa lurrera heltzekotan dagoela deskubritzen duen apez bati buruzkoa da.

Hurrengo emanaldia sartu garen ekain honetako 24ean izango da, 'Perdita Durango' (1997) filma jendaurreratuz. Segidan, uztailaren 26an, beti asteazkenez eta gaueko hamarretan, 'Komunitatea' (2000) etorriko da. Ondoren, abuztuaren 26an, '800 bala' (2003), eta irailaren 30ean 'Krimen perfektoa' (2004), zikloa urriaren 28an bukatzeko, 'Haurraren Gela'rekin (2006).

Erakustaldia Euzko Etxearen areto izendatu berri batean egingo da, 'Euskal Herria aretoa'n, 150 pertsona erraz hartzen dituena. Antolaketa arrazoiak medio, zikloan parte hartzeko interesadunei astelehenetik ostiralera pasatzeko eskatzen zaie, iluntzeko zazpietatik bederatziak arte, sarrerak jasotzeko. Sartzea libre eta kitorik da.

Lotura interesgarriak

Alex de la Iglesiaren orria
http://www.clubcultura.com/clubcine/clubcineastas/delaiglesia/index.htm

Alex de la Iglesia Mendoza, gaztelaniazko Wikipedian
http://www.clubcultura.com/clubcine/clubcineastas/delaiglesia/index.htm