euskalkultura.eus

San Nicolas, Argentina. Urtarrilaren 19tik 26ra gauzatuko da San Nicolaseko Euskal Etxean, Buenos Aires hiritik 245 kilometro iparmendebaldera, Euskara Munduan proiektuaren 2013-2016 lau urteko lehenengo barnetegia. Euskara irakasle berriak trebatzeko helburu duen ekintza honek HABE eta FEVAren babesa du; antolakuntza, ordea, San Nicolaseko euskal erakundeko kideen esku geratu da haiek eginiko eskaerari erantzunez.

Ikasketak 2013an hasiko dituen taldea Argentina, Txile, Uruguai eta Brasilgo euskal etxeetako ikaslek osatzen dute; hala ere, kopuru hau handi daiteke, gonbitea Kolonbia, El Salvador eta Peruko euskal etxeei ere bidali baitzaie. Lan modalitateari dagokionez, urtean bi ikastaro trinkotara - udan eta neguan- joan beharko dute ikasleek, datozen lau urteetan. Horretaz gain, asteroko atal bat egin behar izango dute urruneko ikastaroarekin betetzeko.

“Ikastaroa oinarrizko mailatik hasiko da eta aurrez aurreko eskolatan euskarazko oinarrizko ezagutzak eskainiko dira. Hori dela eta, materialaren lehenengo unitateak aztertuko dira eta erremotoan nola sartu eta plataforma nola erabili irakatsiko da”, azaldu dute antolatzaileek. 

Klaseak urtarrilaren 19tik 26era burutuko dira, 9:00etatik 11:00etara eta 11:30etatik ordu batera. Arratsaldez, berriz, 6:00etatik 7:00etara eta 7:30etatik, 9:00etara bilduko dira ikasle eta irakasleak. Ostatua San Nicolaseko Argentino Hotelean izango da, Garibaldi kaleko 136. zenbakian, eta klaseak eta otorduak, euskal etxearen egoitzan.