euskalkultura.eus

Santa Fe, Argentina. Kronologikoki Beteranoaren Eguna izan zen lehena, apirilaren 2an, eta euskal etxe santafetarra ohi bezala bertaratu zen, Santa Feko euskaldunen ordezkari, omenaldietan eta gainerako ekintza abertzaleetan parte hartuz. Halaxe egin zuen Malvina irletan eroritakoen aldeko omenaldian, beteranoak eta euren familiak, buruzagi publiko eta agintariak, hainbat erakunde eta elkartetako ordezkariak, Gizataldeetako ordezkariak eta hainbat herritar ere bertan zirela. Euskal Etxeko lehendakari Catalina Villanuevak berak eraman zuen ikurriña ekitaldietan, Gure Etxeatik EuskalKultura.com-i azaldu zaionez.

Euskaldunak present egon ziren baita ere TC 2000 auto lasterketan, apirilaren 9 eta 10ean, Santa Fe hiriko kale zirkuitu batean. Ekaineko Gizataldeen Azoka iragartzea izan zen, besteak beste, partaidetza horren helburua. Euskal Etxearen ordezkari, Silvia Regoli Roa, izan zen, euskal dantzariz jantzita, eta harekin batera Ramiro Papini Jaureguiberry Sagardoy, Gure Etxearen elastikoa soinean.

Euskal Etxeko Zuzendaritza Batzordeko kide diren bi ordezkari hauek Santa Fen presentzia daukaten beste zenbait gizataldetako ordezkariekin batera ekainaren 18, 19 eta 20ean hirian egingo den Gizataldeen Azokaren folleto eta programak zeramatzaten, jendearen artean banatzeko. Jakina denez, Euskal Etxeak bere lekua izan ohi du Azoka horretan, eta halaxe izanen du aurten ere, kulturari eta gastronomiari eskainitako bi stand ipiniz, hurrenez hurren.