San Frantzisko, AEB. Pandemiak ekarritako itxialdi eta murrizketa neurriek San Frantziskoko euskal komunitatearen baitan ekarritako ondorioek, urte osorako programa iragarrita zeukan bere Euskal Zinema Zikloko emanaldiak bertan behera uztea ekarri zuen. Pixkanaka normaltasun batera etortzea helburu duen bidean, Zinema Zikloak antolatzaile duen BEOk (Basque Educational Organization) zinema saio presentziala berreskuratzea iragarri du, datorren ostiral honetan, urriaren 9an, hori bai, kopurua murriztuta, musukoa ezarrita eta aldez aurretik lekua erreserbatuz.
Berriro plazaratzeko aukeratu den filma Paul Urkijoren "Errementari: The Blacksmith and the Devil" da. 19:30etan pantailaratuko dute Gure Euskal Etxearen (Basque Cultural Center) egoitzan. Erreserbak hemen egin daitezke edo, telefonoz, +1 415 235 4651 zenbakira deituz. Saioak19:30etatik 22:00ak bitartean iraungo du.
BEOk honako oharra adierazi du: "Hau gure lehenengo filma da COVID-19 dela-eta ezarritako murrizketak altxatu zirenetik. Eserleku kopuru oso mugatua izango dugu eta, beraz, erreserbak derrigorrezkoak dira". "Musukoak behar dira. Ez da janaririk edo edaririk onartuko, musukoak beti ezarrita egon daitezen. Mila esker ulertzeagatik".
Lagun bati bidali
Komentarioa gehitu
