Sagardoa eta zortzi txakolin mota probatzeko datorren astean Durham-en, Ipar Karolinan, dastaketa batean

2009/07/20

Matthew Beason antolatzailea (argazkia sixplates.com)

PUBLIZITATEA

Txakolin dastaketa bat, bai, Estatu Batuetako Ipar Karolinan, Matthew Beason-ek bere 'Six Plates' jatetxe-ardandegian antolatua. Ardotan aditua da Matthew Beason, eta etorri berria da duela hilabete pasexea Euskal Herritik, bertan zenbait upategi eta txakolindegi bisitatu ostean. Dastaketa datorren asteko astelehenean izango da, uztailaren 27an, eta zortzi txakolin mota eta sagardoko bakarra eskainiko ditu dastagai, tartean, laguntzeko, pintxoak eta tortila, antxoak eta bestelako mokaduak. Luxuzko aukera bat, Estatu Batuetako alde honetan lortzen batere erraza ez dena.

Durham, NC, Estatu Batuak. Bigarren urtez segidan antolatua dute Matthew Beason-ek eta 'Six Plates'ek txakolin dastaketa. Kasu honetan, Beason bera Euskal Herrian ibili eta hilabete pasexera, bertako upategi eta txakolindegi batzuk bisitatu ondoren. EuskalKultura.com-ekin solaskide, ardozale durhamdarrak Euskal Herriak lehenengo aldiz ikusi zuenean liluratu egin zuela esan digu eta dituen erakargarrien artean ardoak eta gastronomia kokatzen dituela zalantzarik gabe.

Txakolinen kasuan, honakoak ipiniko dira dastagai, Euskal Herriko hiru txakolin eskualdeak hartuz: Arabako Txakolina (Xarmant); Getariako Txakolina, Amestoi (txuria eta rosée); eta Bizkaiko Txakolina, Aretxaga (bi klase) eta Gorrondona (txuria eta beltza); sagardoari dagokionez, Tolosako Isastegiko izango da. Ardo guztiak daude merkaturatuta Estatu Batuetan edo berehala egongo dira egoera horretan.

Matthew-ek summer wine (udako ardo) bikaintzat jotzen du txakolina, azpimarratuz daukan gustu argi eta burbuilatsua, ezin uztarketa hobea egiten duena "esaterako, ostrekin". Dastaketa oso prezio apalean prestatu da, bost dolarren truke, prezioaren barruan txakolin/sagardo edalontzi bat opari. Ekitaldiak eguerdiosteko ordu bietatik goizaldeko ordu bietara iraungo du eta bertako musika talde batek girotuko du.

Lotura interesgarriak

'Six plates' winebar, Durham-en, Ipar Karolina
www.sixplates.com

Txakolin jatorrizko izendapen denda ofiziala
www.txakolin.com

Tolosako Isastegi baserriko sagardoa
www.isastegi.com

Idiazabal gazta
www.quesoidiazabal.com