euskalkultura.eus

Pelotas, Brasil. Rio Grande do Sul Euskal Etxeak iragan ekainaren 8an egin zuen Pelotas hirian Euskal Kultur Topaketa, eta 70 bat lagun bildu ziren bertara, asko eta asko euskal jatorridunak. Gehienak Brasildik etorri ziren --Porto Alegre, Santana do Livramento, Alegrete, Uruguaiana, Florianopolis, Porto Alegre, Sao Paulo-- eta baita Uruguaitik ere. Horrez gain, Buenos Airesetik heldu ziren Mikel Ezkerro hizlaria eta Sara Pagola, Euskadiko ordezkaria Mercosurrerako. 

Elkarteko presidentea, Ana Luiza Paniagua Etchalus, oso pozik agertu da topaketak izan duen harrera onarekin eta, haren esanetan, antolakuntzan lanean jo eta su aritu diren bazkideak harro eta indarberrituta atera dira.

Blog berriaren aurkezpena

Ekimenei dagokionez, Etchalusek Mikel Ezkerro irakasleak euskal immigrazioari buruz eman zuen hitzaldia azpimarratu du: "Ikusgarria izan zen; gizon aparta da, eskuzabaltasun izugarriduna. Entzuleak hunkituta gelditu ziren eta gogoangarria izan zen ekitaldia euren euskal jatorria ikertzen hasi direnentzat".

Bestalde, Haritz Aranburu sukaldari donostiarrak, euskal etxeko bazkidea berau, euskal gastronomiari buruzko hitzaldia eman zuen. Amaitzeko, euskal etxeak blog berria aurkeztu zuen: casabascars.blogspot.com.br.

[Ana Luiza Etchalus presidentea euskal etxearen blog berria aurkezten, diseinuaren ardura izan duen bazkideen lantaldearekin. Taldeko buru izan da Alejandro Argañaraz, Claudia Etchepare bazkidearekin batera (argazkia RGSEE)]

Topaketan Pelotas hiriko hainbat agintari izan ziren, eta baita Sao Pauloko Casa Basco Brasileira Euskal Etxeko presidente Oskar Goitia ere. Ekitaldiak oihartzun zabala izan zuen bertako komunikabideetan, bereziki irratian eta egunkarietan.

Lantaldeari esker ona

Ana Luiza Etchalusek antolakuntzan aritu diren bazkideen "gogoa, emozioa eta errespetua" azpimarratu ditu eta esker ona agertu nahi izan die, banan banan, lantaldeko kideei: 

- Guilherme Escosteguy Flores da Cunha
- Ana Maria Longaray
- Diego Irigoyen Pereira
- Laura Ramirez Bruña
- Claudia Etchepare
- Haritz Aranburu
- Alejandro Arganaraz
- Claudio Martin Damboriarena Escosteguy
- Valerio Askonobieta
- Gregorio Beheregaray

Pelotas hiriko lantaldea:

- Fabricio Iribarrem
- Elimar Insaurriaga
- Ricardo Irigon Vinhas
- Vera Lucia Sallaberry
- João Pedro Zabaleta
- Lourdes Etcheverry

Zorionak guztiei! Eta eutsi lan onari!