euskalkultura.eus

Porto Alegre, Brasil. Larunbat honetan egingo da 3. Euskal Kultur Topaketa Pelotas hirian, Rio Grande do Sul estatuko euskal etxeak antolatuta. Pelotas estatu honetako hiriburu den Porto Alegretik 256 kilometrotara dago eta Uruguaitik oso gertu. Euskal Herriko immigrante asko hartu ditu historikoki Uruguaik, eta gertutasun hori dela medio, askok Brasilera jauzi egin zuten, elkarteak aditzera eman duenez.

Topaketaren egitaraua honakoa izango da:

- 14:00: Inaugurazioa eta RGS Euskal Etxeko zuzendaritzaren ongi etorri hitzaldia, Euskadiko ordezkari Sara Pagola bertan izango delarik. Ekitaldian parte hartuko dute ere Pelotaseko hainbat agintarik eta Sao Pauloko Casa Basco-Brasileira elkarteko presidente Oskar Goitiak.

-15:00: Euskal Historia eta Immigrazioari buruzko hitzaldia eskainiko du Mikel Ezkerro irakasle euskal argentinarrak.

-16:00: Haritz Aranburu chef donostiarraren lantegia euskal sukaldaritzari buruz.

-17:00: Euskal Etxearen blogaren aurkezpena.

-18:00: Koktela.

Rio Grande do Suleko Euskal Etxeko bi talde aritu dira lanean bilkura antolatzeko: batetik, Pelotas hirian Fabricio Iribarrem, Ricardo Irigon, Vera Sallaberry, Elimar Insaurriaga eta João Pedro Zabaleta; bestetik, Porto Alegren Ana Luiza Etchalus, Haritz Aranburu, Laura Ramirez Bruña, Valerio Askonobieta, Ana Maria Longaray, Alejandro Argañaraz, Diego Irigoyen, Claudia Etchepare eta Guilherme Escosteguy bazkideek.

Antolatzaileek ehun bat lagun espero dituzte. Topaketa Pelotaseko Feria Nacional de Los Dulces delako azokaren baitan egingo da. Inguruotako azoka garrantzitsuentakoa da eta bertako eta hurre diren hirietako bisitari asko izaten ditu: Pelotas, Rio Grande, Arroio Grande, Bage, Canguçu, Santana do Livramento, Santa Vitoria, Porto Alegre eta baita Uruguaikoak ere.

Euskal etxeko zuzendaritza kide Ana Luiza Paniagua Etchalusek EuskalKultura.com-i azaldu dionez, elkartearen helburua urtean horrelako lau topaketa egitea litzateke: Porto Alegre, Pelotas, Santana do Livramento eta Uruguaiana hirietan. Aurrera eta zorte on!