euskalkultura.eus

Posadas, Argentina. Arazo ekonomikoak gaindituta, kalean da berriro Euskal Jatorri-ren bi hilabetekaria. Gogora dezagun buletinaren banaketa doakoa izan dela orain artean –eta hala jarraitzen du– eta elkarteko bazkide eta lagunei, FEVAra eta euskal etxeetara ez ezik, Posadas hiriko erakunde askotara ere helarazten zaiela, tartean  ‘Agenda 21’ proiektu ekologikoa garatzen duen 356. zenbakiko Eskolako kideei.

Euskal Jatorrik bertsio digitalean ikusten du geroa. Apirileko alea, aldizkariaren 23. zenbakia alegia, bi formatoetan plazaratzeko erabakia hartu zuen. “Oso garestia egiten zaigu paperezko bertsioa egin eta igortzea. Azken zenbaki hau argitaratu ahal izateko, publizitatetik lortutako dirua ez zen nahikoa izan. Hori dela eta interneten eskura daiteken bertsioa bultzatzea erabaki genuen. Merkeagoa da eta gainera jende askorengana iristen da”, azaldu dio EuskalKultura.com-i euskal etxeko lehendakari Marta Sarasolak.

Aldizkariaren 23. zenbakiari dagokionez (hemen eskura daiteke) mota askotako artikuluez dator. Nagusia Leitza herriari buruzkoa da, Nekane Alcoz Arregui etxeko bazkideak idatzia. Horrez gain, Iñigo Urkullu lehendakari berriak Euskal Diasporari zuzendutako lehenengo agur-gutuna, Euskal Herriari buruz Cesar Arrondoren idatzitako bat eta beste zenbait irakurgai dakartza buletinak.

Euskal Jatorri-ren izen bereko argitalpe elektronikoa zeurean jasotzeko cvmisiones@gmail.com helbidera idatzi baino ez duzu. Aldi berean, erakundetik jakinarazi digute edizio berriak ateratzen joan ahala euren Facebook-eko kontuan (Centro Vasco Misiones) ere islatuko dituztela.

Biltzar Nagusia (gaur), euskara eta zinema

Euskal etxean egunero gauzatzen diren ekintzak iragarri eta zabaltzeko oso baliabide ona da aldizkaria, zalantzarik gabe. Eta zenbakian zenbait aktibitate iragartzen dira, hala nola:

Apirilaren 25ean -gaur bertan alegia- Ohiko Biltzar Orokorra egingo da Posadasko euskal instituzioan arratsaldeko 7etan. Bileran 2012ko balantze eta memoria irakurriko dira eta agintari berriak hautatuko.

Bestetik, euskara klaseetan parte hartzera gonbidatzen dute Euskal Jatorri-tik. Elkarretaratzeak astean behin izaten dira eta hizkuntzaz gain, musika eta kulturari buruzko artikuluak lantzen dira.

Azkenik, eta urtero bezala, ziklo zine bat eskainiko dio euskal etxeak komunitateari. Hitzordua Posadasko Herriko Liburutegian izango da, ekaineko astelehenetan, iluntzeko 8:30etan. 2013ko ziklo honetan, Carlos Gabilondo zine adituaren hitzaldi bat ere sartuko da programan.