euskalkultura.eus

9 de Julio, Argentina. Herri honetako Etxe Maitea Euskal Etxeko kide den Elene Kortejarenak argitaratu berria duen testua aurkeztuko da etzi 9 de Julioko Jose Ingenieros Liburutegian. 'Ongi Etorri, Joakin’ izeneko lanaren idazlearekin batera Elizabeth Tuma Diario del Viajeroko zuzendariak, Hector Iaconis 9 de Julio egunkariko kazetariak eta Maria Amelia Dadet Bragadoko Danak Anaiak euskal etxeko euskara irakasleak ere hartuko dute parte aurkezpenean.

“Ongi Etorri, Joakin liburua Euskal Herritik etorri ziren pertsona guztiei eginiko omenaldia da. Izan ere, Joakin Kortejarenaren bizitza hartu nuen eredu, baina euren lur maitea utzi behar izan zuten, eta Argentinara etorri behar izan ziren euskaldun guztien historia kontatzeko”, azaldu dio Elene Kortejarenak EuskalKultura.com-i bere lanari buruz galdetuta. “Joakin 1926an iritsi zen Argentinara Gipuzkoako Villabonatik. Bera bezala milaka euskaldun etorri ziren herrialde urrun honetara baina euren kultura, hizkuntza eta ohiturak galdu gabe. ‘Joakin’ hauen guztien omenean idatzi dut liburua”.

Elene Kortejarena idazlea

Elene Kortejarena Buenos Aires probintziako 9 de Julion bertan jaiotakoa da eta irakaskuntzan aritu izan da urtetan lanean, oinarrizko hezkuntzan eta ahalmen desberdinak dituzten umeekin. 2003an hasi zen bere familiaren zuhaitz genealogikoa egiten eta 2007an Euskal Herria bisitatu zuen. Bidaiak mundu berri batean murgiltzeko aukera eman zion eta euskaldunen mundu horretan murgilduta ekin zion liburu hau idazteari. “Herrimina eta nostalgia sentitu izan zituzten guztiei eskaintzen diet nire liburu hau”, azaltzen du Kortejarenak.

9 de Julio-ko Jose Ingenieros Liburutegiaren, bertako Etxe Maitea Euskal Etxearen eta Julio de Vedia Museo eta Artxiboaren babesa dituen ekitaldia igande honetan izango da, arratsaldeko 8etan. Aipatzekoa da aurkezleen artean, Maria Amelia Dadetek, Bragadoko Danak Anaiak-eko irakasleak, berak euskaratu dituen liburuko pasarte batzuk irakurriko dituela.