euskalkultura.eus

Iruñea-Pamplona. Aurkezpeneko partaide izan ziren Bixente Arozena, Udalbideren izenean, Xabier Martinez de Alava, Olentzeroren Lagunak Elkartekoa , Mikel Arbeloa, Proiektuaren koordinatzailea, eta Rafa Eneterreaga, Lesakako Olentzeroren laguntzailea. Eurak azaldu zuten Olentzeroren Lagunen Elkarteak kide dituela, besteak beste, honeako herrietako jendea: Mungia, Lesaka, Baiona, Tutela, Iruñea, Lizarra, Urretxu, Corella, Baztan…

[Atzo Iruñean eginiko prentsaurrekoa, Bixente Arozena (Udalbide) mintzatzen, mahaikide Xabier Martinez de Alava (Olentzeroren Lagunen Elkartea), Mikel Arbeloa (proiektuko koordinatzailea) eta Rafa Eneterreaga (Lesakako Olentzeroko partaide) dituela]

Aldi berean, eta Olentzeroren etorrerari buruz, ezinbestean Gabon gauan ez duela etorri behar esan zuten, eta leku batzuetan 25ean ere iristen dela; eta Baionara, esaterako, abenduaren 18an heldu zela, eta Otsagabira abenduaren 27an ailegatuko dela [Diasporan abendu hasieran hasten da bisitak egiten eta bukatu, berriz, urtarrilean ere buka dezake, hala nola Bordeleko Eskual Etxearen kasua, non Olentzero jaia urtarrilaren 9an izango den]

Olentzero.net proiektua gauzatzea --berez garatzen ari da oraindik, urrats berriak iragarri baititu-- Olentzeroren Lagunen Elkarteari Udalbidek emaniko sostengua medio izan da posible, bat etorri baitira bi erakundeak Olentzero eta bere munduari buruzko jakingarri guztiak plazaratu eta jendearen artean biziarazteko neurrietan.

Webgunea euskaraz, gaztelaniaz, frantsesez eta ingelesez irakur daiteke, eta sail edo atalak dauzka besteak beste:

-Komikia Olentzerori buruz, txikienentzat
-Albiste sail orokorra, tartean Diasporako Olentzeroren bat ere aipatzen duela, hala nola Mexiko DFkoa eta Boisekoa, Estatu Batuetan
-Euskal Herri osoko Olentzeroen mapa
-Argazki eta bideo sail bat, ehundaka argazkiz
-Jolasteko atal bat, Olentzeroren kantuaren hitzak bilduz, baita ipuinak ere, mozgarriak, grabaketak, ipuin gehiago, errezetak...

-Webgunea: www.olentzero.net
-Udalbideren webgunea: www.udalbide.net
-Izena duenguztia... Bada!: www.izenaduba.com