euskalkultura.eus

Townsville, Australia. North Queensland-eko Euskal Etxeak jai eder batekin agurtu zuen 2011 urtea. Jaia aire zabalean, elkarteko berdegunean, egitea zen asmoa, baina eguraldi txarra kari, barruan egin behar izan zuten. Hala ere, elkarteko bazkide ausart batzuk animatu ziren kanpoaldean jarri zen karpan bazkaltzera.

Elkarteak haurrentzako ur-jokoak zituen antolatuta, baina euria zela eta bertan behera gelditu ziren. Hala ere, haurrak ez ziren batere kikildu eta kanpora irten ziren jolastera, putzu eta lokatz artean plisti-plasta. Ondoren, batzuk oraindik ere bainujantzia jantzita eta goitik-behera blai eginda, Olentzeroren belaunetan eseri ziren, banan-bana opariak jasotzeko.

[Olentzero -Jon Larrazabal- elkarteko neska-mutil batzuekin (argazkia TownsvilleEE)]

Bazkaria, catering zerbitzu baten bidez entolatu zuen oraingoak elkarteak. Pedro Mendiolea presidenteak EuskalKultura.com-i azaldu dionez, "Euskal etxeko zuzendaritzak urtean zehar sukaldean lan egiten duten bolondresei eskerrak eman nahi zizkien, eta kanpoko zerbitzu bat kontratatzea erabaki genuen, eurek ere jaiaz gozatzeko aukera izan zezaten".

[Ezkerretik eskubira Mary Longarte, Joan Aranas, Jose Longarte, Pedro Aranas eta, aurrean, Dot Gabiola, bazkariaz gozatzen (argzkia TownsvilleEE)]

Bazkalostean Mendioleak hitz batzuk egin zituen eta eskerrak eman zizkien elkarteko bazkideei urtean zehar erakutsitako babesarengatik. "Elkartea egoera ekonomiko onean da eta 2012an lagun eta bazkide guztiei gure ekitaldietan parte hartzeko gonbitea egin nahi diegu", esan zuen Pedro Mendioleak.

Madrilgo Euskaltegi-Txikian ere

Munduaren bestaldean, Madrilen, Olentzero Euskal Etxeko Euskaltegi-Txikiko neska-mutilekin bildu zen. Esti eta Lur andereñoek jai ederra antolatu zuten eurentzako, dantza taldeko kideekin batera. Horren guztiaren isla, elkarteak bideo hau argitaratu du bere webgunean:

-Bideoaren bigarren partea eta beste bideo batzuk, Madrilgo Euskal Etxearen webgunean, hemen