euskalkultura.eus

Boise, AEB. NABO federazioa euskara ikastaroa ari da antolatzen Lazkaoko Maizpide barnetegian. Klaseak egunean sei ordukoak izango dira, eta horrekin batera ikasleek kultur jarduerak ere egingo dituzte. Igandeetan kultur bidaiak eta txangoak egingo dira.

Ikastaroaren prezio 414 eurotakoa da (ikastaroa, ostatua eta janaria barne). Parte hartzeko 16 urtetik gora izan behar da, eta ikastaroa NABOk antolatu badu ere, mundu osoko euskara ikasleek eman dezakete izena.

Ikastaroa aurrera atera dadin gutxienez zortzi laguneko taldea osatu behar da. Maila oinarrizkoa izango da, baina NABOk maila aurreratuagoan parte hartzeko aukera ere eskaintzan du. Maizpidek beste ikastaro trinko bat eskaintzen du ekainean (hilabete osoa) eta baita uztaileko eta abuztuko azken bi asteetan.

Izena eman nahi izanez gero edo informazio gehiago eskuratzeko, idatzi e-maila Izaskun Kortazar NABOren Euskara koordinatzaileari hona: izaskunkortazar@gmail.com.

Korrika Boisen

Bestalde, Boiseko euskaldunek euskararen aldeko beste ekimen baten berri eman dute egunotan. Idaho hiriburuko euskaldunak Basque Run/Walk Korrika ekitaldiaren edizio berri bat ari dira antolatzen, AEK euskaltegien koordinadorak Euskal Herrian egiten duen euskararen aldeko lasterketarekin batera. Martxoaren 9an egingo da eta bertan biltzen den dirua AEBetako euskara irakasleen trebakuntzan laguntzeko erabiliko da.

Lasterketa Boiseko Basque Center-etik abiatuko da eta irteera animatzeko Txatxangorriak taldeak kontzertutxo bat emango du, Oinkariko dantzari batek aurreskua dantzatuko du eta umeentzako jokoak egingo dira. Boiseko alkate Dave Bieter-ek emango du irteera. Lasterketa amaituta bazkaria egingo da euskal etxean eta ondoren poteoa Basque Block kalean zehar.