euskalkultura.eus

Iruña-Pamplona. 'Varia Palafoxiana'k Juan de Palafoxi buruzko hamabi lan edo artikulu biltzen ditu, honako aditu eta ikerlariek sinatuak: John H. Elliott (Oxford Unibertsitatekoa, Erresuma Batua); Nancy H. Fee (Columbia Unibertsitatekoa, Estatu Batuak); Montserrat Galí (Pueblako Unibertsitate Autonomokoa, Mexiko); Ricardo Fernández (bi azterlan ditu), Mercedes Galán, Fermín Labarga, Pilar Latasa, Ignasi Saranyana, Jesús María Usunáriz eta Miguel Zugasti, Nafarroako Unibertsitatekoak; eta Ildefonso Moriones, Karmeldar Oinutsen postulatzaile nagusia Erroman.

Liburua Palafoxen artxibo partikularra eta funts dokumentala osorik katalogatu ondoren argitaratu da. Horri esker, Palafoxen irudia zehatzago ezagutu daiteke, 2011erako aurreikusita dagoen bere beatifikazioaren aurretik. Aurkezpenak Palafoxen Ostiralak izeneko hitzaldien zikloa amaitzearekin bat egin du, zikloa Nafarroako Unibertsitateak antolatua, Foru Gobernuarekin eta beste entitate eta erakunde batzuekin lankidetzan, Fiteron egina uztaileko eta abuztuko ostiraletan.

1.000 ale eman dira argitara eta 15 euroren truke eskura daitezke Nafarroako Gobernuaren Argitalpen Zerbitzuan (Navas de Tolosa kalea 21, Iruñea) eta liburu-dendetan. Internetez, hemen.

Ikus: www.cfnavarra.es/publicaciones

Biografia

Juan de Palafox y Mendoza Fiteron jaio zen 1600. urtean. Espainia Berriko erregeordea eta Puebla de los Ángelesgo (Mexiko) gotzaina izan zen, eta geroago, Burgo de Osmako (Espainia) gotzaina. Aragoiko noble baten semea zen, Arizako markesaren semea, eta ama alarguna zen. Geroago, ama Zaragozako komentu batean sartu zen eta bertako priore izendatu zuten.

Calatayuden Olivares konde-dukearekin bildu eta azken horrek Filipe IV.aren gorterako kooptatu zuen, eta bertan hainbat kargu izan zituen erregearen aholku-organoetan, baita Indietako Kontseiluan ere. 1629an Kontseiluko kidea zen, eta urte horretan apaiz ordenatu zen.

1639an Indietara joan zen, Pueblako gotzain izendatu baitzuten. Hiri horretan katedrala eraiki zuen, eta geroago Espainia Berriko erregeorde izendatu zuten. Palafoxen Liburutegia sortu zuen eta lan publizista, pastoral eta kanoniko oparoa egin zuen. Espainiara 1649an itzuli zen eta Aragoiko Kontseiluko kide eta Burgo de Osmako gotzain izan zen 1959an hil zen arte.