euskalkultura.eus

euskal diaspora eta kultura

Albisteak rss

Kaliforniako prentsak euskal gazte baten bihotzari esker bizi den emakume amerikarraren kasua aipatzen du

2007/12/03

Gaizka Larrañaga (eskubian) Renoko lagun batekin Tahoe lakura egin zuen txangoan (argazkia C.Urza)
Gaizka Larrañaga (eskubian) Renoko lagun batekin Tahoe lakura egin zuen txangoan (argazkia C.Urza)

PUBLIZITATEA

Bihar asteartea Mary DiMaggio kaliforniarrak, 63 urteko emakumeak, Euskal Herrira bidaia egingo du Larrañaga familia ezagutzeko. Ez dute sekula elkar ikusi eta ezin izango diote elkarri ulertu, Maryk ez duelako ez euskara ezta gaztelerarik egiten eta Larrañagatarrek ingeles apur bat baino ez dakitelako. Baina badago hizkuntzen gainetik batzen dituen zerbait: Gaizka Larrañagaren bihotza. Gaizka 2003an auto batek harrapatuta hil zen Renon eta Maryk bere bihotza jaso zuen. Orain, lau urteko errekuperazio luzearen ondoren DiMaggio bidaia luzeari aurre egiteko prest agertu da, familiari bere eskerrona agertu asmoz. Kaliforniako Mercury News egunkariak argitaratu du berria.
San Jose hirian bizi da Mary DiMaggio kaliforniarra eta bihar ekingo dio Euskal Herrira eramango duen bidaia zail eta luzeari, egun bat beranduago iristeko. Hegaldien artean geldialdiak egin beharko ditu eta bidaian zehar hegazkinean oinez ibili beharko da, odol zirkulazio arazoak ez izateko. Baina, nahiz eta osasun egoera makalean izan, bidaia egiteko arrazoi indartsua du DiMaggiok: eskerrona. Kaliforniarrak 2003an bizitza salbatu zion bihotza eman zuen familia arrasatearra ezagutu nahi du: Gaizka Larrañaga 32 urteko gaztearen guraso eta arrebak.

Ezbeharrak markatzen du bi aldeen arteko harremana. 2003ko abuztuaren 13an Gaizka bizikletan zebilen Renoko kaleetan. Atzerriko Hizkuntzak eta Literaturan masterra egitera heldua zen Renoko Unibertsitatera. Aurreko urtean ere ibilia zen bertatik, USAC erakundeak egiten duen ikasle truke programari esker. Klaseak hasteko egun batzuk falta ziren oraindik, baina arratsalde hartan auto batek harrapatu eta gaztea akabatu zuen.

Familiaren eskuzabaltasuna

'Gazte oso atsegina zen eta kirolari ona', gogoratzen du Carmelo Urza USAC erakundeko zuzendariak. Txirrindularitzarekiko zaletasunak batzen zituen biak eta Gaizkaren ikaskideekin mendi txangoan eta ibilaldiak antolatu zituzten Reno inguruan eta Lake Tahoe aldean. Gaizkaren heriotzaren ezbeharra gertatu zenean bere aita Jose Mari Larrañaga Renora bidaiatu zen hilotzaren kargu egiteko eta Urzak etxean hartu zuten egun gogor haietan. Egoera latz horretan Jose Marik semearen organoak emateko erabakia hartu zuen, eta erabaki horrek Mary DiMaggioren bizitza salbatu zuen.

'Larrañagatarrak familia aparta direla erakutsi zuten eta oso hurrekoak dira guretzat', gaineratzen du Urzak. 'Urte batzuk beranduago nire alaba Donostian izan zen ikasketak egiten eta beraiek etxean hartu eta familiako bezala zaindu zuten, txangoak egitera eraman zuten, Arantzazu erakutsi zioten... Gaur egun ere alaba haien etxera joaten da herriko jaietarako'.

Euskal Herrira joateko gonbidapena

Eskuzabaltasun bera aurkitu zuen Mary DiMaggiok trasplantea izan eta pixkat bizkortu ostean familiarekin harremanetan jarri zenean. Hasieran komunikazioa ez zen erraza izan, hizkuntza elkar ulertzeko oztopo zelako. Baina azkenean gaztelera hitzegiten duen DiMaggioren lagun baten bitartez telefonoz hitz egitea lortu zuten eta Larrañagatarrek Euskal Herrira joateko gonbitea egin zioten DiMaggiori.

Bidaia egitea ezinezkoa izan da orain gutxi arte, osasun arazoak medio. Duela lau hilabete jaso zuen DiMaggiok bidaia egiteko baimena eta geroztik prestatzen ari da luze amestutako bisita egiteko. Larrañagatarren harrera eta arrasatearrek idatzitako e-mailak akuilu izan dira: 'bihotz oso maitea dugu amerikar on eta eskerroneko baten gorputzean', idatzi zion Jose Marik. Aste honetan bertan elkarrekin bildu eta Maryk bere bihotzeko familia ezagutzeko aukera izango du.


Lotura interesgarriak

Kalifornian gaiari buruz argitaratutako artikuluetako bat
Mercury News egunkariaren webgunean

Gaizka Larrañagaren aipua Renoko CBS-aren webgunean
http://basque.unr.edu


« aurrekoa
hurrengoa »

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.com

jaurlaritza gipuzkoa bizkaia