euskalkultura.eus

Bilbo, Bizkaia. Aipatu egunkari bilbotarraren artikuluak azpimarratzen du Lopez lehendakariak aurretik Ardanza eta Ibarretxek egindakoari eutsi diola Jaialdiko bere presentzia iragarriz, eta hilabeteak direla bidaia hori iragarri eta Jaurlaritzako eta Jaialdiko ekipoak lantzen eta zehazten ari direla. Ez da ahaztu behar Jaialdi dela munduan, Euskal Herritik kanpo, jenderik gehien erakartzen duen euskal festa, bost urtean behin, zero eta bostean amaitzen diren urteetan beti Estatu Batuetako Idaho estatuko Boise hiriburuan antolatzen dena, bertako euskal erkidegoa eta autoritateak lankide.

Artikuluak dioenez, lehendakariaren bidaia urtarriletik aipatzen ari den bitartean, Jose Luis Bilbao eta Bizkaiko Foru Aldundiaren ordezkaritzarena ez da oraindik ofizialki ezagutarazi, baina foru erakundeak joan den arteartean Pete Cenarrusa Idahoko estatu-idazkari ohiari eman zion 'Bizkaiko Kuttuna' titulua eskuz-esku ematea izango luke helburu, 93 urte dituen Cenarrusaren adin altuak Euskadira bidaiatzea galeraziko bailioke. Cenarrusak abertzale eta euskaltzaletzat definitu izan du bere burua, eta dagoeneko Sabino Arana Fundazioaren saria eskuratua du, besteak beste bera medio bitan onartu baitute ofizialki Idahoko ganbarek Euskadiren eta euskaldunek euren buruari buruz erabakitzeko eskubidearen aldeko agiriak, azkenekoa egun Boiseko Dave Bieter alkate euskaldunarekin batera bultzatua.

Bi ordezkaritzak ekitaldi paraleloak antolatuko omen dituzte, izaera desberdinekoak baina leku eta ordu ez beretan baina bai beretsuetan, oraindik ere egitarauetako batzuk erabat itxi gabe badaude ere. Correok dioenez, Lopez lehendakariaren ekipoak ezinbestekoa jotzen zuen lehendakaria Boiseko ekitaldian present egotea euskaldunen ordezkari instituzional gisa agertu eta bere irudia sendotzeko. Jose Luis Bilbao Boisen egoteak, berriz, euskal elkarretaratze horretatik kanpo ez gelditzea eta sozialistek euskal presentzia ez monopolizatzea ekarriko luke, Lopezi oposizioa eginez. Artikuluak ez du baztertzen ekitaldiotara buruzagi jeltzale gehiago hurreratzea ere.

-Artikulua, jatorrizko gaztelaniaz, Correoren webgunean, hemen