euskalkultura.eus

Mar Chiquita, Argentina. 'XIX. mendean Mar Chiquita eskualdeak euskal jatorrizko anitz etorkin jaso zituen. Euskaldun horiek –adierazten dute Mar Chiquitan– trebeak baino trebeagoak ziren lurra lantzen. Argentinak bizitza hobea izateko aukera eman zien. Haiek, horren truke, lur emankor hauek munduko aletegi bihurtu zuten', azaltzen dute euskal komunitateko ordezkariek. Gaur Buenos Aires probintziako partidu hau nekazaritza eta abeltzaintzako arloko partiduetako onena da Argentina mailan. Karia horretara, eta Panpako ohiko biztanleari, gautxoari, alegia, eta bere laguntzaile zintzoari, zaldiari, omenaldia egiteko, urtero antolatzen da Moxalaren Jaia edo Fiesta Nacional del Potrillo.

Jaio berria den Izatez Harro Euskal Etxearentzat bere lehenengo jendaurreko ekitaldia izan da hau eta oso kontentu daude lortutako arrakastarekin. FEVA, Mar del Platako Denak Bat eta Tandilgo Gure Etxea euskal etxeen laguntzarekin, partaidetza polita izan zuen erakunde berriak herri osoak parte hartzen duen jai honetan.

[Izatez Harro Euskal Etxeko kideek altxatutako stand-a (argazkia EE)]

Stand-a, kabalkada eta dantzak

Euskal Herriari buruzko informazioa banatu eta zabaltzeko, stand bat jarri zuten Izatez Harro-ko kideek. Han bertan Bilboko Udalak bidalitako materiala, bibliografia, mapak eta beste oroigarri batzuk zeuden ikusgai. Horretaz gain, Tandilgo Dantza Taldeak bere ikuskizuna eskaini zuen desfilean, bazkari ofizialean eta baita agertoki nagusian ere. 'Desfilearena oso une zirraragarria izan zen --azaldu diote EuskalKultura.com-i bertaratutakoek-- ikurrina eta Argentinako bandera elkarrekin kulunkatzen zirenean haizearen eraginez'.

[Tandilgo Gure Etxea-ko dantzariek dantza egin zuten Coronel Vidaleko kaleetan (argazkia EE)]

Jaiaren erregin euskaduna

Jaiaren amaierak beste sari bat emango zion euskal komunitateari, etxe berriko ordezkari zen Jimena Rivadavia Azurmendi Festaren Erregina hautatua izan zenean. Hemendik aurrera eta urte betez, Jimena Mar Chiquitako euskaldunen eta Marchiquita partidu osoko enbaxadorea izango da ekitaldi ofizialetan Argentinako berrehungarren urteurrenaren urtean.

[Jimena Rivadavia Azurmendi, jaiaren erregina, printzesekin eta Tandilgo dantzariekin batera (argazkia EE)]

Bukatzeko, euskal etxeko behin-behineko lehendakari den Fernando Mandagaran-ek eskerrak eman nahi dizkie jaiaren 32. edizio honetan stand-era hurbildu zen lagun guztiei eta hurrengo bileran parte hartzera gonbidatzen ditu. Hitzordua datorren martxoaren 9an da, gaueko 9etan, Sociedad Rural Elkartean.

Lotura interesgarriak

'Izatez Harro' Euskal Etxearen webgunea
www.centrovascomch.webcindario.com/noticias.htm