euskalkultura.eus

Oberá, Argentina. Immigranteen Eguna ospatuz, Oberá hiriak Argentinara orain dela 50 urte etorri zirenei omenaldia egin zien irailaren 6ean, ostegunez. Omenaldia jaso zutenetakoa izan zen Maria Isabel Beitia euskalduna, Posadaseko Euskal Jatorri elkartearen sortzaileetako bat. Euskal Etxearen ordezkaritza bat berarekin izan zen Oberan, une hunkigarri hau Maria Isabelekin partekatzeko.

Eguna Gizataldeen Desfilearekin hasi zen eta Euskal Jatorriko ordezkaritzak aurten ere bat egin zuen bertaratu ziren beste 15 kolektibitateekin. Desfileak lau kilometroko bidea egin zuen, hiri erdigunetik Nazioen Parkea deritzon guneraino. Euskaldunek, haur zein nagusi, alai bete zuten bidea, euskal jantzi tradizionalak soinean.

[Ezkerretik eskuinera, Alberto Pernia, L. F. de Etcheto, Maite Andueza Etcheto, Marta Sarasola, Mariangeles Rosciani (Amaia alaba besoetan duela), Ma. Virigina Labat eta Alba Ibarrola, Oberako Gizataldeen Desfilean (argazkia PosadasEE)]

Nazioen Parkean Immigranteen Eguneko bi asteko jaiari hasiera eman zion ekitaldia egin zen, Misiones probintziako gobernadorea, Maurice Closs, buru zelarik. Ekitaldi honetan Obera hiriko intendenteak (alkateak) omenaldiaren agiri oroigarria eman zion Isabel Beitiari, 50 urtetan Misionesen kulturaren alde egin duen lana eskertuz.