euskalkultura.eus

Vitoria-Gasteiz. Iñigo Urkullu lehendakaria Europako erakundeetako arduradun nagusiekin bilduko da Bruselan bihar eta etzi. Han, bere gobernu-programa eta Euskadiren egoera ekonomiko, sozial eta politikoa azalduko dizkie, Eusko Jaurlaritzak jakinazari duenez. Bidaia hau Lehendakariak Europaren botere-gunera egingo duen lehena izango da, eta, horren bidez, Eusko Jaurlaritzak Europaren aldeko apustu irmoa egingo duela agertuko die Batasuneko erakundeei.

Bihar helduko da Urkullu Bruselara, eta, lehenik eta behin, Europako Batzordeko presidente Jose Manuel Durão Barrosorekin bilduko da. Ondoren, Barne Gaietako Batzordeko buru Cecilia Malmströmek hartuko du Lehendakaria eta Euskadin bakea eta bizikidetza finkatzeari lotutako alderdiak jorratuko dituzte. Eguneko bilkurak amaitzeko, Lehiakortasun Batzordeko buru Joaquin Almuniarekin topaketa egingo du.

Arratsaldean, Bruselako euskal komunitateari harrera egingo dio Lehendakariak, Europar Batasunerako Euskadiren ordezkaritzan. Ekitaldian, EBrako Euskadiren ordezkari Marta Marinek, Kanpo Harremanetarako idazkari nagusi Marian Elorzak eta Lehendakariak hitz egingo dute. Topaketa honetan

Etzi, goi-mailako beste bilera batekin amaituko du bidaia Urkulluk; hain zuzen ere, Europar Kontseiluko presidente Herman Van Rompuyrekin.

Bestalde, aipatu gaur bertan Bruselara heldu dela Arantza Tapia, Ekonomiaren Garapen eta Lehiakortasuneko sailburua. Bidaiaren helburua zera da, Euskadiren I+G+b politiken Europarekiko diagnostikoa partekatzea. Horretarako, Tapiak bilera egingo du Ikerketa, Berrikuntza eta Zientzia Batzordeko buru Máire Geoghegan-Quinnekin eta Energia Batzordeko buru Günther Oettingerrekin.