euskalkultura.eus

Bartzelona, Katalunia. Bartzelonako Euskal Etxea indarberrituta dator oporretako etenaldiaren ostean eta ikasturteari hasiera emateko egitarau zabala prestatu du. Horrez gain, elkarteak "kulturaren aldeko apustua egiten" jarraituko duela adierazi du, "sektoreak pairatzen dituen murrizketen gainetik". Horren adierazle dira, Euskal Etxeak doan edo prezio herrikoietan eskaintzen dituen ekitaldiak.

Ekitaldi horien artean aipagarria da "EH Avui" solasaldi zikloa, bertan Euskal Herriko alderdi politiko eta zenbait herri ekimenetako ordezkariak izango direlarik. Zikloak ikuspegi desberdinetako gonbidatuak biltzea lortu du eta bertan izango dira, besteak beste, Bildu, PSE eta PPko ordezkariak.

Maribi Ugarteburu hizlari

Ekitaldiak ostiralean abiatuko dira, Juanito Oiarzabal mendizalearen hitzaldiarekin. Gasteiztarrak 2011ko udaberrian Lhotse mendira eginiko espedizioa izango du hizpide. "EH  a la Muntanya" zikloaren parte da ekitaldia. Biharamunean, larunbat honetan, Onna kantariak kontzertua emango du Euskal Etxean.

Irailaren 10ean elkarteak "EH Avui" solasaldi zikloa hasiko du. Aurreneko hizlariak "Gure Esku Dago" herri ekimeneko Iñigo Urrutia eta Zelai Nikolas izango dira. Irailaren 12an Bildu alderdiko Maribi Ugarteburuk hartuko du lekukoa. Irailaren 13an Roger Sallas eta Ricard Gonzalez mendizaleek "GR-11, el camí que ens uneix" hitzaldia emango dute eta irailaren 14ean Gari kantariak kontzertua eskainiko du Euskal Etxean.

Arantza Quiroga eta Andoni Ortuzar

Irailaren 18an "EH Avui" zikloaren hitzaldi berri bat hartuko du Euskal Etxeak, oraingo honetan Euskal Herriko Alderdi Popularreko presidente Arantza Quirogarekin. Irailaren 20ean Alex Txikon mendizaleak hitzaldia emango du eta 21ean Pau Alabajos eta Josu Bergara musikariek kontzertua eskainiko dute. Irailaren 27an Irati Anda mendizaleak emango du solasaldia eta 28an Sei urte taldeak doako kontzertua emango du. 

Urriaren 4an, "EH Avui" zikloaren baitan, EAJko buru Andoni Ortuzar izango da Euskal Etxean. Ziklo honen barruan ere, baina oraindik finkatu gabeko datan, PSEko ordezkari bat izango da hizlari Bartzelonako Euskal Etxean.

Informazio gehiago, Bartzelonako Euskal Etxearen blog-ean.