euskalkultura.eus

Buenos Aires, Argentina. HABE institutuak eta FEVAk bultzatzen duten Euskara Munduan programari esker euskaldunen hizkuntza Argentinako euskal etxe askotara heldu da azken urteetan. Horrekin batera gero eta euskal-argentinar erakunde gehiago dira Euskara Nazioarteko Eguna ospatzen dutenak. Kasu askotan, gainera, klaseen amaiera eta oro har euskal etxeetan gauzatzen diren beste hainbat ekintzen urteko zikloaren bukaera ere ospatzen da topaketa hauetan. EuskalKultura.com-eko artikulu honetan, ospakizun horietako batzuen laburpena:

[Trenque Lauquengo Euskal Etxean, Mikel Ezkerrok hitzaldia eman zuen abenduaren 1ean, Euskararen Eguneko ospakizunen baitan. Urteari ‘agur’ esateko ere bildu ziren Euskal Sustraiak-eko lagunak. Menua, erreki eder bat]

[Chascomuseko euskal erakundean, berriz, euskarari buruz hitz egiteko ardura izan zuena La Platako Unibertsitate Nazionaleko irakurlegoko irakaslea izan zen. Abenduaren 1ean ere, ‘Euskara, Europan bizirik dagoen hizkuntza zaharrena’ izeneko mintzaldia eskaini zuen Idurre Lekuonak Zingirako Euskaldunak-en egoitzan. Gau berean, hitzaldiaren ondoko afarian, aipamen berezi bat egin zitzaion Estanislao Alfonsin pilotariari, Frantziako Tarbes hiriko Nazioarteko Txapelketan izandako bere partaidetza gogoangarriagatik] 

[Abenduaren lehenengo egunean baina arratsaldean elkartu ziren Euzko Etxea-ko ikasle eta irakasleak urteroko mateada (mate hartzea) burutzeko. Moreno plazako Gernikako Arbolaren ondoan, euskal piknik batekin ospatu zuten ENE La Platako euskaltzaleek (argazkia EE)]

[San Miguelgo Askatasunaren Bidea elkarteko lagunek ere ospatu zuten Euskararen Eguna baina era berezi batean. Bideo hau grabatu zuten, beste erakunde batzuen artean Etxepare Institutuak sustatzen duen ‘Badu bada’ erakusketan aurkezteko]

[Bahia Blancako Union Vascako euskara ikasle eta irakasleak poz-pozik daude eta arrazoia ez da garrantzi gutxikoa. Euskal etxe honen euskararen arduradunek jaso berria dute Eusko Ikaskuntzak ematen duen ENE saria eurei egokitu zaiela aurten eta horrek dudarik gabe indar gehiago ematen die euskararen alde lan egiten jarraitzeko. Bitartean, abenduaren 3an bertan ospatu zuten Euskararen Eguna, mota askotako ekintzekin, tartean Euskal Garagardotegia, dantzak, kantak, danborrada, argazki nobela, jokoak eta karaokea. Ikasleek, gainera, ikasturteko agiriak jaso zituzten] 

[Rio Cuartoko Gure Ametza Euskal Etxean ere euskal abestiak eta karaokea ere entzun ahal izan zen 2012ko Euskararen Eguneko ospakizunean. Jai giro ederrean eta mikrofonoa eskuan, Cordoba hiriburuko euskal etxeko euskara ikasle eta irakasleek euren ahotsa jarri zieten abesti klasikoei. Aipatzekoa da Marita Echave sukaldariak zerikusi handia izan zuela erromerian eskainitako menuan (argazkiak EE)]