euskalkultura.eus

Buenos Aires, Argentina. Euriagatik bertan behera geratu ondoren, igande honetan, maiatzaren 26an, iritsiko da sxkrnik Buenos Airesko Gobernuak antolatutako “Buenos Aires Celebra Europa" (Buenos Airesek Europa ospagai) jaialdia. Maiatzeko Etorbidean, Bolivar eta Piedras kaleen artean, 12etatik 18ak arte, omenaldia gingo zaie 'kontinente zaharreko' 10 gizatalderi, horien artean euskaldunei. Laurak Bat eta Euskaltzaleak Euskal Etxeek dantza tradizionala, janari tipikoak eta euskara eramango dituzte ikur. Parte hartuko duten Europako gainerako nazioak Kroazia, Danimarka, Eslovakia, Finlandia, Irlanda, Norvegia, Portugal, Txekiar Errepublika eta Suedia izango dira.

Partaide askoren lehenengo edizioa izango da. Euskaldunen ordezkaritza artistikoa mugatua izango da eta agertokia partekatuko dute beste gizataldeetako dantzariekin. Buenos Airesko bi euskal elkartek baino ez dute aukerarik izango oholtzara igotzeko. Bertan izango dira Laurak Bateko dantzariak, Carolina Ale, Tomas Cozzi eta Manuela Ortigoza zuzendari, eta Euskaltzaleak elkartekoak, Renzo Bustosen zuzendaritzapean. Donostiako Danborradaren erritua ez da faltako, José María Gutiérrez eta Jorge Rabufetti zuzendari.

Halaber, bi stand kulturaletan euskal etxeetako jarduerei buruzko informazioa banatuko da. Irakasle eta ikasleen eskutik, euskararen txoko bat antolatu da. Jolasak eta zozketak egingo dira, sariak banatuko eta hizkuntza ikasteko ikastaroen berri emango da. Gastronomiari dagokionez, tortilla pintxoak, txistorra bokatak, babarrunak eta txerri giharra piperradarekin bokatan dastatzeko aukera izango dira. Artisautza, oroigarriak, diseinuko objektuak eta jantziak ere erosi ahal izango dira.

Presentzia instituzonala

Bertan izango dira parte hartuko duten Euskal Etxeetako agintariak, hala nola Laurak Bateko lehendakari Arantxa Goicoa eta Euskaltzaleak-eko lehendakari Anabel Jaureguiberry. Era berean, Euskadiren Argentina-Mercosurreko ordezkari Sara Pagola eta FEVAko ordezkaritza baten presentzia espero da. FEVAko lehendakari Asier Iriberri eta lehendakariorde Arantxa Anitua AEBan, bertako euskal erakundeen NABO federazioaren Biltzar Nagusian izango dira asteburu osoan gonbidatu gisa (Argentinako 2024ko Euskal Aste Nazionalaren antolatzaile den Bahia Blancako Union Vascako Iñaki Ederra lehendakaria ere joatekoa zen, baina azken unean ez du egin bidaia),