euskalkultura.eus

Azul, Argentina. Mercosur-eko euskal etxeak bertatik bertara ezagutzeko emandako hitza betetze bidean, Azul hirira iritsiko da gaur Sara Pagola Ordezkaria. Bisitaren baitan erakundeko agintariekin bilduko da Delegatua, iritziak elkar trukatu eta Urkulluren Gobernuko lan lerro nagusiak azaltzeko. Hitzordua gaur da, arratsaldeko 7etan, Irigoyen kaleko 926. zenbakian dagoen egoitzan.

Aste honetako egitarauarekin jarraituz, Gernikako Haritzaren kimu bat landatuko dute Gure Txokoa-ko lagunek larunbatean herriko Immigranteen Enparantzan. Landatze ekitaldia goizeko 10:30etan hasiko da, Malére eta De las Carretas kaleetan kokatuta dagoen berdegunean. Azkenik, eta urtero bezala, herriko Gizataldeen Jaian hartuko du parte euskal etxeak kultur stand batekin. Jaialdia ‘Veredón Municipal’ delako gunean egingo da hamarretik gora erakunde partaide. Azulgo Gizataldeen Jaiaren XVIII. edizioa datorren igandean izango da, gaueko 8etatik aurrea.

Gure Txokoa eta komunitatearekiko engaiamendua

Gero eta zabalagoa da euskal etxeen konpromisoa euren gizarteen bizitzan. Kari horretara, antolatzen dituzten aktibitateen eskaintza handituz joan da azken urteotan. Honekin lotuta, euskal etxekoek jakinarazi dute ekimen berezi bat burutu zutela joan den larunbatean, Diabetesaren Nazioarteko Eguna zela eta.

[Nicolas Castiglione biokimikaria euskal etxean emandako hitzaldian (argazkiaEE)]

Osasunari zuzendutako arratsaldean, Nicolas Castiglione biokimikariak Diabetes eta arrisku faktore kardiobaskularrei buruzko hitzaldi bat eman zuen. Gaiak jakinmina piztu zuen herritarren artean eta entzule asko bildu ziren ekitaldira.