euskalkultura.eus

Vitoria-Gasteiz. Izendapenaren berria atseginez jaso dute Mexikon, Urkulluren gobernuak eginiko lurralde banaketan Mexikok bere leku propioa berreskuratzen baitu, zuzenean Gasteizen menpekoa, bitartekaririk gabe. Lopezen agintealdian, Kanada, Mexiko eta Estatu Batuak New Yorkeko Euskadiren Ordezkaritzaren menpeko jarri ziren, Ipar Amerikako hiru herrialde hauek Sagar Handiaren baitan utziz. New Yorkeko Ordezkaritzarako, ordea, ez zen inor izendatu, eta kargua hutsik egon da legealdi osoan. Mexikok, berriz, harekiko dependentzia teorikoa zeukan, eta teknikari batek asumitua zuen 'Mexikoko Euskadiren Bulegoa'ren ardura.

Neurria begi onez ikusia izan da, gainera, Mexikon, buru doan pertsonaren soslaia ikusirik. Berrogeita hamar urte ez dituen profesionala da Ibon Mendibelzua, eskarmentuduna honelako lanetan, Ibarretxeren garaian Bruselako Euskadiren Ordezkaritzako buru baitzen, Ordezkari gisa.

Mexikon kontsultatu ditugun iturriek azpimarratu dute, baita ere, lotura garrantzitsuak dauzkala familia aldetik Ordezkari berriak Mexikorekin, amaren aldeko familiak erbestea ongi ezagutu zuelarik, Mexikon erroduna baita, urrunago joan gabe bere ama, iaz Algortan hil zen Garbiñe Madariaga Agirre, Agirre lehendakariaren iloba eta besoetakoa, bertan bizi izan zelarik gaztaroan.