Buenos Aires, Argentina. "Elkarrekin egiten den irakurketak irakurtzen den testuen munduaren eta bestelako mundu eta bizipenak hurbiltzen dituelakoan", Euskal Mitologiari buruzko Irakurmen tailerra eskainiko du argentinar hiriburuan bertako Eusko Kultur Etxeak Luis María Etcheverry adituaren eskutik. Ordu eta erdiko zortzi klase izango dira, eta mitologiaren inguruko hainbat gai landuko dituzte ikasleek. Lehenengo lau elkarretaratzeen ordutegia jakinarazi berria du Eusketxek: martxoaren 21ean eta 28an eta apirilaren 4an eta 11an izango dira, iluntzeko 7etatik 8:30etara, beti ere Eusketxeren egoitzan, esan nahi baita Mexico kaleko 1880. zenbakian.
Tailerrerako behar den materiala antolatzaileek eskuratuko diete parte-hartzaileei; ikastaroko lehenengo lau klaseen prezioa $400 izango dira. Parte-hartzaileen artean Ekin argitaletxeak argitaratutako Luis Maria Etcheverry bera egile duen “Oro Velado. Vivencias mitológicas vascas” liburuaren bi ale zozketatuko dira.
Interesatuek eusketxe@gmail.com helbidera idatz dezakete martxoaren 10a baino lehen, izena garaiz eman eta materiala eskuratu ahal izateko. Emailean norberaren izen-abizenak eta telefono zenbaki adierazi beharko dira. Programaren edukiak kontsultatzeko, erakundearen bloga (eusketxe.blogspot.com) bisita daiteke.
Lagun bati bidali
Komentarioa gehitu
