Londres, Ingalaterra. Urtero sasoi honetan bezala, London Basque Society-k bere euskara ikastaroetara izena emateko epea zabalduko du iraila hastearekin. Eskolak online emango dira eta, mailaren arabera, 17.00etatik 19.00etara edo 19.00etatik 21.00etara, urritik aurrera. Aurten maila bakoitzak gramatika eta mintzamen saioak izango ditu. Zuretzat edo Londresen edo Bretainia Handian dagoen norbaitentzat informazioa lortu nahi baduzu, zuzendu zure galderak lasai asko londoneuskerairakaslea@gmail.com helbidera.
Euskara eskolen epea zabaltzearekin batera, baina, Euskal Etxeak, mundu mailan hainbat euskal etxe, elkarte, talde, norbanako eta instituzioek ospatuko duten Euskal Diasporaren Nazioarteko Egunarekin bat egin eta bazkari-elkarretaratze batera deitu du irailaren 6an, 14:30etatik 19etara. Bere ospakizunetako askoren tokian izango da, Goodinge Community Center-en, eta "arratsalde ahaztezin bat" izango dela agintzen dute. Euskaldunentzat menua ere pizgarri ohargarria denez, hona prestatuko duten menua:
- Sarrerakoak
- Plater nagusia aukeran: Bakailaoz beteriko piperrak edo Oilasko errea
- Postrea eta edariak barne
Erreserbatu mesedez irailaren 4aren aurretik. Xehetasunak eta txartela erosteko bidea hemen. Lekuak mugatuak dira. Gonbidapenak honela animatzen du bertaratu eta euskal giroan ospatzera: "Ez galdu Euskal Diasporaren Eguna ederki ospatzeko aukera hau! Erosi orain zure sarrerak eta prest izan euskal kultura, sukaldaritza goxoa eta konpainia zoragarriko egun paregabe batean bizitzeko!"