euskalkultura.eus

Twin Falls, AEB. Bizitza osoa besteen aginduetara lanean ibili ondoren, iragan abenduan Fausto Cuares sukaldariak jatetxea ireki zuen Twin Falls hirian. "Basque — American & Peruvian Diner" delakoan, izenak dioen bezala, inguruotako euskal immigranteek sortu zuten euskal-amerikar estiloko janaria zein bere sorterriko, Peruko, jaki tipikoak eskaintzen ditu Cuaresek.

27 urterekin etorri zen AEBetara Fausto eta orain Idahoko bizilagunei perutar gastronomiaren kutixiak erakusteko irrika du: anticucho-ak edo mazamorra (masustekin eginiko postrea), adibidez, eta, horiekin batera euskal jatorridun txorizo ogitarteko tipikoak eta txuletak. 

Elko-tik Jerome-era

Alejandrina emazteak jatetxe propioa irekitzeko ametsa betetzeko animoak eman zizkion eta, iragan urrian, Cuares familiak Elko utzi eta Jeromera etorri zen. Baina, harrezkero Faustori kosta egin zaio jatetxearen berri zabaltzea eta negozioa ez doa uste bezain ondo.

"Gaizki sentitzen naiz, bezerorik ez dudalako", esan dio Cuaresek www.magicvalley.com-i. Janaria bota egin behar izan du, baina jende gehiago etortzen hasiko dela espero du. Urtebeteko epea eman dio Cuaresek bere buruari. Negozioak gora egin ezean, itxi egin beharko du. 

"Basque — American & Peruvian Diner" (117 Main Ave. E., Twin Falls). Astelehenetik larunbatera irekita, 7:00tik-21:00ra. Tel. 933-2088

Jatorrizko artikulua, ingelesez, hemen.

Munduko euskal jatetxeen zerrenda, EuskalKultura.com-en 'Baliabideak' atalean, hemen.