euskalkultura.eus

euskal diaspora eta kultura

Albisteak rss

Euskal musika eta dantzak indartsu sartu ziren San Telmo auzoan, Buenos Airesko II. Triki-poteoan

2014/03/11

Argentinako euskal gizataldearen eskutik iritsi da Triki-poteoaren ohitura Rio de la Platara (argazkia EuskalKultura.com)
Argentinako euskal gizataldearen eskutik iritsi da Triki-poteoaren ohitura Rio de la Platara (argazkia EuskalKultura.com)

PUBLIZITATEA

Iazko arrakastaren ondoren, Triki-poteo berri bat antolatzeko erronka hartua zuen aurten ere bere gain Buenos Airesko Euskaltzaleak Euskaltegiak. Deialdiak erantzun ezin hobea izan zuen joan den larunbatean eta euskaltegiarekin bat eginez euskal instituzio gehiagoko kideak atera ziren hiriburuko kaleetara, tartean Laurak Bat, Nafar Etxea eta Iparraldeko Euskal Etxea erakunde hiriburutarren artean. Barnealdeko euskal etxeek ere izan zituzten ordezkariak ekitaldi berezi honetan, tartean Arrecifes, La Plata, Mar del Plata, Necochea eta San Nicolas hirietakoek. Iaz bezala, gainera, "Buenos Aires Tartan Army" elkarte eskoziarrak ere hartu zuen parte ekimenean.

Buenos Aires, Argentina. Ehunda berrogeita hamar bat lagun bildu zituen Euskaltzaleak-ek bere 70. Urteurreneko programaren baitan burututako Triki-poteoak. Ekitaldia joan den larunbatean izan zen eta euskaltegiaren egoitzan hasi eta San Telmo auzoko Dorrego Plazan bukatu zen. Euskal musika eta dantzak, eta oro har, Euskal Herria karrikaratzeko asmoa zuen proposamenak harrera bikaina izan zuen hirian, bai tabernetan zein kalean. Hona Triki-poteoaren irudi sorta bat.

Buenos Aireseko 2 Triki poteoa 2014 01

[Buenos Aireseko 2. Triki-Poteoa martxoaren 8an egin zen. Emakumearen Eguneko ospakizunekin bat egiteko, Euskal Herriko izen handiko hainbat emakumeren argazkiak zeuden ikusgai Euskaltzaleak-en egoitzako hormetan]

Buenos Aireseko 2 Triki poteoa 2014 02

[Ibilbidea hasi aurretik, eta Gure Esku Dago Mugimendua bultzatzen ari den kanpainari atxikitzeko, bideo bat grabatu zuten Triki-poteoko parte hartzaileek. Bideoa ikusteko, klik egin hemen]

Buenos Aireseko 2 Triki poteoa 2014 03

[Ibilbidea Euskaltzaleak-en egoitzan hasi zen; handik Estatu Batuak kalera abiatu zen eta Estatu Batuak-etik Defentsara, Dorrego Plazaraino. Ehunda berrogeita hamar bat lagunek hartu dute parte aurten Euskal Herriko musika eta dantzak ezagutarazteko helburua zuen aktibitatean. Aipatzekoa da, beste euskal instituzio batzuk ere bildu zirela taldera, tartean Buenos Aireseko Laurak Bat, Nafar Etxea eta Iparraldeko Euskal Etxea. Eta Buenos Airestik kanpo, Arrecifes, La Plata (Euzko Etxea eta Goierri Elkartea), Mar del Plata, Necochea eta San Nicolas hirietako euskaldunak ere]

Buenos Aireseko 2 Triki poteoa 2014 04

[Buenos Aireseko Triki-poteoan ez da musika tresnarik alde batera uzten. Fandango eta kalejira batzuk alboka bertsioan entzun ahal izan ziren. Argazkian Mauro Telletxea eta Iñaki Eskirotz]

Buenos Aireseko 2 Triki poteoa 2014 05a

[Baina dudarik gabe, Triki-poteoko protagonista nagusiak trikitixa eta trikitilariak izan ziren. Laurak Bat-eko Ignacio Baña Barquin-ek eta Euskaltzaleak-eko Ainhoa Iribar Arostegik zuzendu zuten musikari taldea San Telmoko kaleetan zehar]

Buenos Aireseko 2 Triki poteoa 2014 05b

[Txistu eta panderoen hotsa ere zabaldu zen Argentinako hiriburuan. Juan Manuel Hiriart, Mauro Uranga eta Jose Gutierrez maisuaren esku, Euskaltzaleak-eko pandero tailerraren ikasleak lagun, Triki-poteoa euskal jai bihurtu zen]

Buenos Aireseko 2 Triki poteoa 2014 06

[Iaz bezala, Eskoziako ikur bat diren gaitek ere alaitu zuten Buenos Aireseko gaua. Gitarrarekin,  ‘Donald Where's Your Troosers?’ abesti klasikoa abestu zuten Buenos Aires Tartan Army taldekoek]

Buenos Aireseko 2 Triki poteoa 2014 07

[Dantzari talde ederra bildu zen Triki-poteoan. Eta ibilbideko taberna eta kaleak agertoki hartu zituzten, Fandango, Arin-Arin, Kalejirak eta Jotak dantzatzeko. Argazkian, Nafar Etxeko Miguel Fernandez eta Pilar Sarasa]

Buenos Aireseko 2 Triki poteoa 2014 08

[Triki-poteoa Defensa Plazara iritsi azkenik]

Buenos Aireseko 2 Triki poteoa 2014 09

[Bukatzeko, 2. Triki-potearen bat-bateko argazki batzuk. Euskaltzaleak Euskaltegiak esker beroak eman nahi dizkie ekitaldian izan ziren  musikari, dantzari eta poteatzaile guztiei eta bere 70. Urteurreneko ospakizunetan parte hartzen jarraitzeko gonbitea luzatzen die]



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia