euskalkultura.eus

Necochea, Argentina. Martxoaren hasierarekin batera, Hator Honaren edizio berrian parte hartzeko deialdia luzatu die Necocheako Euzko Etxeak Euskal Herriko 18 eta 30 urte arteko gazteei. Proposamenak, eta gazte horien presentziak Argentinan, bi helburu nagusi ditu: batetik, Diasporako euskal etxeetan dagoen Euskal Herriaren irudia ahalik eta eguneratuago mantentzea; bestetik, euskal eta euskal-argentinar gazteen arteko harremanak sendotzea.

Hator Honaren 10. edizioa uztailaren 18tik abuztuaren 10ra luzatuko da (aldaketaren bat gerta daiteke, Buenos Aires probintziako neguko oporren data aldatuko balute) eta epe horretan Euskal Herritik etorritako lagunek klaseak eta tailerrak eskainiko dizkiete euskal etxeko kideei. Eskatzen diren ezagutzak arlo hauetakoak izango dira: dantza, musika, euskara, kirola eta gastronomia. Eta ohi bezala eta erakunde antolatzailetik adierazten dutenez, titulurik ez da behar; ezagutza eta esperientzia apur bat eta irakasteko gogoa nahikoak dira programan parte hartzeko. Parte hartzaileek Argentinarako euren bidaia ordainduko dute eta euskal etxeak ostatu osoa emango die.  

Gogora dezagun Hator Hona programa 2004an jaio zela Necocheako Euzko Etxea-ren baitan eta geroztik burututako edizioetan Euskal Herriko bazter guztietako 61 gaztek hartu dutela parte. 2013an, alabaina, Euskal Herria izan zen ‘Hator Hona’-ko egoitza. Programatik pasatu ziren neska-mutilak bisitatzeaz gain, hainbat jai eta ekitalditan aritu ziren Necocheatik joandako gazteak.

Aurten, ordea, bere ohiko formatura bueltatuko da eta Euzko Etxea-ko kideak prest daude Euskal Herriko gazteen eskaera eta proposamenak jasotzeko. Izena emateko epea apirilaren 20ra arte luzatuko da eta ekimenak zabalik daukan blogean egin daiteke www.hatorhona.blogspot.com helbidean. 

Webgunean bertan jakinaraziko dira hautaketen emaitzak eta proiektuari buruzko informazioa gehiago ere berttan lor daiteke. Emailez ere eska daiteke, hona: hatorhona@gmail.com. 

Esango dugu, bukatzeko, Euzko Exea-ko gazteek, aktibitatea sustatzeko bideo bat egin dutela. Bideoa ikusteko, egizu klik hemen.