euskalkultura.eus

Buenos Aires, Argentina. Buenos Airesko Nazioarteko Liburu Azoka hispaniar hizkuntzako literatura, liburugintza eta materialgintzaren erreferente handienetakoa da nazioartean eta galdu ezineko hitzordu bihurtu da denboraren poderioz mundu osoko hizkuntza honetako aditu, ikasle, idazle eta irakurleentzat. Stand-ekin batera, 39. edizio honetan ere hamaika kultur ekimen, hitzaldi, ikastaro, ikuskizun eta zabalkunde ekitaldi eskainiko ditu, aurten apirilaren 25etik maiatzaren 13ra 'La Rural' deitzen duten Buenos Airesko eremuan.

Urtero legex, euskaldunek ere izango dute euren lekua, izan ere Argentinan bertan euskal gaiez argitaratutako liburu, cd eta dvd-ek eta baita Euskal Herritik ekarritakoek ere. Horiek guztiak eskuragai egongo dira Eusko Jaurlaritzaren babesarekin Juan de Garay Euskal Argentinar Fundazioak eta FEVAk antolatutako standean, pabilioi horiko 1908. zenbakian.

Standaren eskaintzaz gain, euskal gaiei buruzko lau liburu aurkeztuko dira Azokaren baitan. Ekitaldia maiatzaren 6an izango da arratsaldeko 5:30etan, Victoria Ocampo aretoan, eta jendaurretuko diren izenburuak hauek izango dira: Askoren artean eginiko Anuario 2012 de Los Vascos en la Argentina Familias y Protagonismo (Euskaldunak Argentinan. Familiak eta protagonismoa, 2012ko urtekaria), Jorge Beramendiren Instituto Americano de Estudios Vascos (Euskal Ikasketen Institutu Amerikarra), Mauricio Goyenechearen Martín de Alzaga eta Jorge Beramendiren Cocina Vasca (Euskal Sukaldaritza). Juan de Garay Fundazioko kide diren Mauricio Goyenechea eta Jorge Beramendi arduratuko dira aurkezpenaz.