euskalkultura.eus

Rauch, Argentina. Lagun talde polita bildu zen apirilaren 27an Rauch-eko Kultur Etxean hiriko euskal etxeak deiturik. Proposamena 'Euskal elikadura, tradizionala ala modernista?' hitzaldian parte hartzea zen, eta Euskal Herriko kulturaren zati bat, sukaldaritza alegia, modu sakonagoan ezagutzea.

Ekitaldiarekin hasteko, Gure Txokoa-ko lehendakari Silvia Contek ongietorria eman zien gonbidatuei; horren ostean instituzioko dantzarien txanda izan zen:  Madalen Ibargoyen-en eskutik ohiko euskal koreografia batzuk dantzatu zituzten etxeko neskatoek.

[Jendez gainezka agertu zen Rauch-eko Kultur Etxeko areto nagusia hitzaldiaren egunean (argazkiaEE)]

Elkarretaratzearen baitan, eta aurreko urteetan egin zen bezala, euskal etxeko kide helduenei egin zitzaien omenaldi txiki bat. Aurtengo edizioan Emilsa Avilak jaso zuen saria.

'Euskal elikadura, tradizio edo modernismoa?'

Euskal Herriko kultur adierazpen garrantzitsuenetako bat da sukaldaritza eta hori arlo askotan ikus daiteke. Jakina denez hamabi Michelin izar baino gehiago zenbatu ahal dira Euskal Herrian; eta goi mailako esparru horretatik at, zaila da imajinatzea mokadurik gabeko topaketarik euskaldunen artean. Baina jateko ohiturak ez dira beti berdinak izan eta gizartean gertatzen diren aldaketak sukaldean ere islatu ohi dira.

Historiaurretik gaur arte euskal elikadura nola aldatu den azaldu zuen Maite Salsamendi lizentziatuak bere mintzaldian. Horretaz gain, Euskal Herriko lurralde bakoitzeko elikagai nagusiak zeintzuk diren ere aipatu zuen eta zer nolako eraginak izan dituzten aurrerapen teknologikoek gastronomian.

[Maite Salsamendi lizentziatuak, diapositibak baliatu zituen hitzaldia emateko (argazkiaEE)]

Maite Salsamendiri dagokionez, aipatu behar da Universidad Nacional del Centro-n ikasi zuela Elikagaien Teknologia eta Eusko Ikasgaietan unibertsitate aditua dela, Euskal Herriko Unibertsitateko titulu batekin.  

“Ekintza honekin 2013 honetarako dauzkan helburuak betetzen hasi da euskal etxea. Asmoa, beti bezala, euskal kultura zabaltzea eta geure kultura argentinarrengan daukan eragina ezagutaraztea”, azaldu digute Gure Txokoa-ko arduradunek. Gure Txokoa Facebook-en dago Centro Vasco “Gure Txokoa” de Rauch izenpean.