euskalkultura.eus

Bartzelona, Katalunia. Europako euskal etxeetako euskara irakasleentzako trebakuntza ikastaroa egingo du HABEk bihar eta etzi Bartzelonan, Euskara Munduan programaren barruan. EuskalKultura.com-ek  jakin ahal izan duenez, 15 irakaslek baieztatu dute jardunaldietarako partaidetza. Ekimenak erantzun oso ona jaso du eta, besteak beste, honako elkarteetako irakasleak elkartuko dira ostegunean Bartzelonan: Madrilgo Euskal Etxea, Valentziako Euskaltzaleok, Valentziako Centro Vasco Navarro, Londresko London Basque Society, Berlingo Euskal Etxea, Pariseko Euskal Etxea eta, jakina, Bartzelonako Euskal Etxea. 

HABEk euskal etxeetarako irakasleentzat trebakuntza planak adosten ditu urtero, Euskara Munduan programaren baitan, euskal etxeekin eta federazioekin, eta horren barruan kokatzen da Bartzelonako ikastaroa. Aurreko urteetan ere egin izan dira horrelakoak: orain urte batzuk Madrilgo eta Bartzelonako euskal etxeetako irakasleak hasi ziren elkartzen, eta ondoren Mallorcako eta Valentziakoak ere bildu ziren topaketa hauetara. Aurten gonbitea Europa osora zabaldu du HABEk.

600 ikasle baino gehiago

Jardunaldietan parte hartuko duten 15 irakasleek 600 ikasle baino gehiago dituzte, baina esan beharra dago euskal etxe batetik bestera desberdintasun asko daudela. Hori kontutan izan dute antolatzaileek eta, oso eskarmentu desberdinetako irakasle eta euskal etxeak elkartzen direnez, lehenengo saioan, esperientzia trukea egingo dute. "Asko daukate elkarri eskaintzeko eta, batez ere, eskarmentu handiko zentruek txikiei beren jardueraren berri azalduko diete", agertu du HABEko teknikari Kinku Zinkunegik.

Bigarren saioan, gai desberdinak jorratuko dira, tartean hiztegia nola landu, eduki kulturalak nola txertatu ikas-saioetan, nola kudeatu talde berean adin eta helburu desberdinak dituzten ikasleak, HABEren egiaztatze-frogak (eskalak) eta internet-en baliabide osagarriak (Ikasbil berria).

Euskara irakasleak ezezik ostegun-ostiraleko saio hauek euskal etxe europarretako ordezkari gehiago bilduko dituzte Bartzelonako Euskal Etxera, euren asmoa kontinenteko euskal etxeetako kideek elkar hobeto ezagutu eta elkarren berri eta eskarmentu hobea izan dezaten bultzatzea izanik, euskal etxe katalana anfitrioi.