euskalkultura.eus

Buenos Aires, Argentina. Eusko Jaurlaritzaren Argentina, Brasil, Paraguai eta Uruguairako Ordezkaritzatik beretik laburbildu zaigunez, Elvira Kortajarena joan den asteartean bildu zen Buenos Airesko Mexiko 1880 helbidera, bertan egoitza daukaten Ekin Euskal Argitaletxea, Euskaltzaleak elkartea eta Eusko Kultur Etxea bisitatu eta bertatik garatzen den kultur lan zabala gertuagotik ezagutzeko.

Horretarako hiru erakundeotako buruzagi arduradunak errezibitu zuten eta eurekin eraikin osoa ibili zuten, Ordezkariak lehenengo eskuko informazioa bildu ahal izan zuelarik egunero eta etengabe bertan egiten diren ekimenez, gehien bat euskara eta euskal kultura arloan, baina tartean dantzak, kantua, tailerrak, hitzaldiak, erakusketak eta beste hainbat, beti ere elkarteotako indarra diren Buenos Airesko euskaltzaleen engaimendu etengabearen bultzada medio.

Gaur ostirala, Elvira Kortajarena Mar del Platara mugituko da, bertan, batetik Denak Bat Euskal Etxea bisitatuko duelarik, berau baita aurtengo Euskal Aste Nazionaleko antolatzaile. Eta bestetik, Ordezkariak parte hartuko du gaur iluntzean kostaldeko hiri horretako hotel batean turismo arloko profesionalen aurrean Euskal Autonomia Erkidegoaz egingo den aurkezpenean (ikus agenda).