euskalkultura.eus

Ecilda Paullier, Uruguai. Montevideoko Haize Hegoa eta Rosarioko Gure Etxea euskal elkarte uruguaiarrek bat egin zuten joan den larunbatean, azaroaren 8an, Ecilda Paullier herriko Gizataldeen Jaiaren III. edizioarekin, antolatatzaileek propio gonbidatuta. Herri hau San Jose departamentuan dago, Montevideotik 110 kilometrotara eta orain dela 125 urte sortu zuten.

'Euskaldunek, libaniarrek, italiarrek, alemaniarrek, suitzarrek eta espainiarrek sorutu zuten hiria, Federico Paullier-en gidaritzapean', azaltzen dio EuskalKultura.com-i Haize Hegoako presidente Enrique Poittevinek.

[Montevideoko Haize Hegoa eta Rosarioko Gure Etxeako ordezkariak Ecilda Paullier-eko kaleetan dantzari Gizataldeen III. Jaian ( Haize HegoaEE)]

Gaur egun Ecilda Paullier abeltzaintza eta artisautza industriak garatzen ari da eta etorkizun handia duen hiria da. Aldi berean, euren sustraiak ez ahazteko, herriko Mascep taldeak (Movimiento de Acción Social y Cultural de Ecilda Paullier) Gizataldeen Jaia antolatzeari ekin zion eta aurten hirugarren edizioa egin zuten jada. Herriko biztanleek pozik parte hartu dute aurten ere jaian eta herrira hurbildu diren kanpotarrei harrera beroa egin diete. Horien artean Montevideoko eta Rosarioko euskal elkarteen ordezkariei.

[Montevideoko Haize Hegoa Euskal Etxeko dantzari txikien taldeak, Txiki Alaiak, izenari ohore egin zioten eta pozez eta gustura aritu ziren dantzan Ecilda Paullier-eko Gizataldeen Jaiaren III. edizioan]

'Guk bi dantza taldeekin parte hartu genuen: helduen “Eusko Indarra” eta txikien “Txiki Alaiak”. Gurekin batera Rosarioko “Alaitasuna” dantza taldea aritu zen eta emanaldi politak egin genituen elkarrekin', laburbiltzen du Poittevinek.

[Montevideoko Haize Hegoako eta Rosarioko Gure Etxeako dantzari nagusiak elkarrekin aritu ziren taulagainean Ecilda Paullier herriko Gizataldeen Jaiaren III. edizioan]