euskalkultura.eus

Donostia-San Sebastian. Unibertsitate munduak ere bere ikuspuntua ekarri zuen V. Mundu-Batzar honetara, eta hau osteguneko saioetan gertatu zen bereziki, Euskal Herria Mugaz Gaindi Mintegiarekin. Yolanda Gomez Echevarria bilbotarra etorri zen Espainiako gobernuko 'Kanpoko Espainiar Herritartasun Zuzendaritza Nagusi'ko ordezkari, erakunde horretako zuzendariordea denez, indarrean dituzten programa eta abantailak eta, besteak beste, itzulitakoen edo retornatuen gaia ere plazaratuz. Hona eguneko argazki kronika.

[Orain arte sekula ekarri gabeko ikusmolde eta lekukotasuna izan zen Espainiako gobernuarena, kanpoan dauden espainiar herritar eta itzulitakoentzat dauzkaten programen berri eman zutelarik, estatu- zein autonomi-erkidego mailan dauden datu eta esperientziak azalduz (argazkia EuskalKultura.com)]

[Kanpoan bizi diren herritarrek eta itzulitakoek erabil ditzaketen baliabideak aipatu zituen, besteak beste, Yolanda Gomez Echevarria Espainiako gobernuko 'Kanpoko Espainiar Herritartasun Zuzendaritza Nagusi'ko zuzendariordeak (argazkia EuskalKultura.com)]

[Bitartean, eta aurreko egunetik hasita, bilerak egiten ari ziren areto kanpo aldean, Diasporaren Azoka moduko bat euskal etxe eta kanpoko euskal erakunde eta taldeen produkzioa eta baliabideak ari zen aurkezten, hainbat stand-en bidez euskal gizataldeetan ematen diren proposamen eta ekimenak jendaurretuz. Talde horien artean zegoen EuskalKultura.com-ek ipinitako stand-a. Beste stand batzuk ziren, esaterako, NABO eta FEVArena, HABErena, Fundacion Vasco Argentina Juan de Garay-rena, Boiseko Euskal Museoarena, Deustuko Unibertsitatearena, EHUrena... guztiak Diasporaren gaiari lotuak. Irudian, gure kide Bego Miñaur Buenos Airesko Miguel Fagoaga Euskal Echea elkarteko lehendakariarekin (argazkia EuskalKultura.com)]

[Bakoitzaren diasporak ezaugarri berezkoak baditu ere, Kataluniako, eta geroago Galiziako ordezkariek euren kanpoko herritarren panorama eta gobernuen politika eta zerbitzuak aurkeztu zizkieten batzarkideei (argazkia EuskalKultura.com)]

[Euskal etxe eta federazioetako ordezkariek harretaz segitu zituzten azalpenok. Irudian, batzarreko partaideak (argazkia EuskalKultura.com)]

[Baina Batzarraren areto nagusiko eta aipatu Azokako programez aparte, alboko bi aretotan beste bi proposamen paralelo eman ziren Batzarraren denbora berean. Argazkian ikusten dugun honetan, Argitxu Camus-Etchecopar ikertzaileak euskararen presentzia eta euskararen irakastearen gaia aurkeztu zuen (argazkia EuskalKultura.com)]

[Eta hirugarren areto batean, Diasporaren gaia jorratzen zuten filme eta dokumentalak eman ziren, entzuleak Donostia eta inguru zabal bateko eskola eta ikastoletako 11-13 urte bitarteko ikasleak izanik. Aurkeztutako tituluak, besteak beste, Amaya Oxarango-Ingram-en "Basques in the West" (ingelesez), Javier Zubizarretaren 'Artzainak' (euskaraz eta ingelesez)... Hitzaldiak ere eskaini zitzaizkien ikasleei, hauek ere euskaraz, ingelesez eta gaztelaniaz (argazkia EuskalKultura.com)]

[Stand-a ipini zutenen artean Boiseko Euskal Museoa zegoen, Patty Miller zuzendaria buru, eta stand-arekin batera 'Hidden in Plain Sight: the Basques' erakusketa zabaldu zuten, euskaldunen eta Ipar-Ameriketarako euren emigrazioari buruzkoa. Irudian, Miguel Azqueta, Uruguaiko ordezkaria Batzarrean, erakusketako ataletako batean (argazkia EuskalKultura.com)]

[Hitzaldien ondotik, mahai-inguruak etorri ziren Batzarreko areto nagusian, gobernuetako ordezkariak eta unibertsitate eta mundu akademikoko iritzi eta ikuspuntuak elkarren ondoran ipiniz (argazkia EuskalKultura.com)]

Egin ziren liburu aurkezpenen erakusgarri, irudian agertzen dena: Aizpea Goenagak aurtengo Andres Irujo Sariko bi irabazlekideen obra saritu argitaratuak aurkeztu zituen: John Alejandro Ricaurte kolonbiarraren "Vasco-navarros en Antioquia (1890-1970): una aproximación a la historia de migrantes, religiosos y exilados", ezkerrean; eta Fabio Echarri argentinarraren "Eusebio Zamakola Abrisketa: un basauritarra en el Chaco argentino", Aizpea Goenagaren eskuinean (argazkia EuskalKultura.com)]