Laprida, Argentina. “Nola bizi du kartzelatik ateratzea 30 urtetan preso egon zen pertsona batek?” “Nola da bergizarteratze prozesua?” Galdera hauei eta beste batzuei erantzuten die Ander Zurimendi kazetari gasteiztarrak orain Argentinan plazaratu den "Recoja sus cosas" liburuan, Parot Doktrinak eraginda 2013an kaleratutako ETAko bost preso ohiren esperientzia pertsonalak hizpide. Lauburu Argitaletxeko buru Nicolas Chavesen hitzetan, “Egiazko historiak, kontakizun itxuran. Euskal gatazkari buruzko beste begirada bat, Bilbon kokaturik”.
"Recoja sus cosas" Lauburu Argitaletxe argentinarrak Kataluniako Pol-len Argitaletxearekin batera egindako lehenengo argitalpena da eta EH Bildu alderdiko Arnaldo Otegiren eta Julieta Gaztañaga antropologo argentinarraren hitzaurreak dakartza. Horrez gain Alfon Fernandezen epilogoa eta Laia Serrak eta Carla Vallek egindako Parot Doktrinari buruzko eranskina ere biltzen ditu.
Liburuak 500 peso argentinarreko prezioa du eta Lauburu Argitaletxeak Argentina osora bidaltzeko aukera eskaintzen du. Informazio gehiago lortzeko edo liburua erosteko, edlauburu@gmail.com helbidera idatz daiteke.
Lagun bati bidali
Komentarioa gehitu
