Ameriketan ibili ziren euskal artzainek Iruñean egingo dute urteroko festa, irailaren 15ean

2012/09/05

Euskal Artzainak Ameriketan elkarteak festaren afitxa aurkeztu du jada

PUBLIZITATEA

Euskal Artzainak Ameriketan elkarteak datorren irailaren 15ean ospatuko du artzain 'amerikanoen' urteroko jaia. Aurtengoa zazpigarren edizioa izango da eta, ohi bezala, hegoaldeko zein iparraldeko artzainak bilduko ditu. Aurtengo bilkura Iruñean egingo da eta Nafarroako Gobernuak eta Iruñeako Udalak ere parte hartuko dute ekitaldietan. Hitzordua heldu bitartean, elkarteak argazki erakusketa antolatu du Condestable Jauregian, artzainek emandako irudi eta oroigarriekin.

Iruñea-Pamplona. Dena gertu du Euskal Artzainak Ameriketan elkarteak eta datorren irailaren 15ean artzain 'amerikanoen' urteroko besta ospatuko du Iruñean. Dozena bat lagunek osatzen dute elkartea, gehienak artzainak edo artzainen seme-alabak, baina talde askoz zabalagoak erantzungo euren deiari, izan ere, aurreko edizioan adibidez, 700 lagun bildu ziren bazkarira. Aurten beste hainbeste espero dituzte.

Antolatzaileek EuskalKultura.com-i azaldu diotenez, jai egun honetan oso gogoan izango dituzte aurreko edizioetan buru belarri lanean aritu eta urtean zehar hil diren lagunak, horien artean Jesus Goldaraz eta Kepa Mallea. Edizio edizio, euskal artzainen datubase zabala osatu zuen Malleak, baina iaz Santutxun erahil zuen bere onean ez zegoen gizon batek, labankadaz.

Egitaraua

Eguneko egitaraua goizeko 10:30tan hasiko da, San Nicolas elizan egingo den mezarekin. Otxote Orbela y Bankako Menditarrak abesbatzek parte hartuko dute. Jarraian,Nafar Gobernu eta Iruñeko Udalaren erakunde-ekitaldia: Gotorlekuko Arma Aretora bisita, Txirdil Fanfarreak gidatuta. Eguerdian Iturrama Ikastetxe Publikoan high ball eta bazkaria, musikak alaiturik.

Festa heldu bitartean, Euskal Artzainak Ameriketan elkarteak argazki erakusketa bat antolatu du. Artzainek emandako argazki eta oroigarriekin osatu da erakusketa, eta Iruñeko Condestable Jauregian dago ikusgai hilaren 14 arte.

2006ean ospatu zen artzain 'amerikanoen' aurreneko festa, Lesakan. Hurrengo urtean hitzordu bikoitza egin zen, aldi berean, Gernikan eta Alduden. Beste edizioak Elizondon, Auritz-Burgueten, Sunbillan eta Eugi-Zubirin izan dira.

Informazio gehiago Euskal Artzainak Ameriketan elkartearen Facebook orrian.