euskal diaspora eta kultura
2009/08/24
Duela 42 urte sortu zenetik urratsak eman ditu Nevada-Renoko Unibertsitateko (UNR) Euskal Ikasketa Zentroak (CBS) Euskal Ikasketa alorrean Euskal Herritik kanpoko zentro eta erreferentzia behinena bilakatu arte. UNRko Zentro eta Liburutegiaz ari gara, bistan da, baina egiari zor Renoko euskal baliabideok pauso berria eman dute azkeneko urtean, lekuz aldatu eta abantaila eta aitzinamendu berrienak dituen 'Matthewson IGT Knowledge Center' delako eraikin adimentsura pasatu baitute euren egoitza. Denbora iragan da inaugurazio ofiziala egin arte, baina ekitaldi hori joan den uztailaren 24ean gauzatu zen, lagun arteko giro abegikorrean, itsasoz bi aldeetako jende eta ordezkariak partaide. Ikus bideo eta irudiak.
2009/08/24
Urte berezia izan da aurtengoa Renoko (AEB) Zazpiak Bat Euskal Etxekoentzat. Ipar Ameriketako euskaldunen historian puntu garrantzitsua izan da Nevadako hiri hau, izan ere geografikoki ere leku egokian kokatzen baita, Estatu Batuetako bi komunitate indartsuenen artean, Idahokoaren eta Kaliforniakoaren artean alegia. Reno hiri euskal ostatuduna izan da, eta egun ere atxikitzen ditu euskal biltoki horietako batzuk. Renon dago Euskal Herritik kanpoko Euskal Ikasketa Zentro eta Liburutegirik garrantzitsuena. Renon sortu zen NABO. Renon dago Euskal artzainaren monumentua eta hiriak bere euskal etxea dauka, Reno Zazpiak Bat Basque Club. (Ikus bideoak)
2009/08/21
Chaco probintzia argentinarreko 'Kotoiaren Lurra' Euskal Etxeak urtero Argentinan 'Haurraren Eguna' dela-eta haur gabetuentzat egiten duen alkartasun txokolatealdiak Resistencia hiriko Nuestra Señora de Itatí zentruko hogeitik gora haur bildu zituen joan den asteburuan. Euskal elkarteko bolondres talde batek, txokolatea eta fakturak zerbitzatu zizkien neska-mutikoei, eta jolas eta kantu batzuk egin zituzten elkarrekin. (Ikus argazkiak)
2009/08/21
Datorren asteartean, abuztuaren 25ean, hasiko da Buenos Airesko Unibertsitatean (UBA) Euskara eta Euskal Kultura ikastaro berria, bertako Hizkuntza Laboratorioan. Ekimenak laugarren urtea izango du aurtengoa. Eskolak hastapen mailakoak izango dira eta izena emateko ez da gradu akademikorik eskatzen. FEVAk eta Unibertsitateak berak antolatutako kurtso hau gainditzen dutenek UBAren agiri bat lortuko dute. Hiru aurreko urteetan bezala, Teresa de Zavaleta euskaldun argentinarra izango da eskola emaile.
2009/08/20
Bere hogeigarren urtebetetzea ari da ospatzen aurten Renoko (Nevada, AEB) Zenbat Gara Euskal Dantzari Taldea. Nevada-Renoko Unibertsitatearen baitan 1989an euskal kultura eta dantzari talde gisa sortua, Lisa eta Enrike Corcostegui senar-emazteek gidatzen duten talde honek Renon egin berria den NABO Biltzar eta Jaia hautatu zuen bere lagun eta jarraitzaileak bildu eta urteurrena festa giroan ospatzeko. Lagunen artean, propio bertaratu ziren Euskal Herritik euskal dantza eremuan arras ezagunak diren Juan Antonio Urbeltz, Marian Arregi, Mikel Urbeltz, Ane Albisu eta Fernando Aristizabal, beste hamaika euskaltzalerekin batera Zenbat Garakoekin bat egin eta hogei urtez egin duten lan ederra errekonozitu eta eskertzeko. (Ikus bideoa)
2009/08/20
Ez daukagu geuk txakolinarekin obsesiorik, baina egiari zor, nazioartean --eta Estatu Batuetan bereziki-- gero eta oihartzun handiagoa eta trataera hobea ematen ari zaizkie txakolinei, eta halaxe gertatua da aste honetan ere, Los Angeles Times egunkariak --AEBetako hiru garrantzitsuenetakoa berau-- 'Wine of the Week' (Asteko Ardoa) gisa hautatua baitu, kasu honetan 2008ko Gurrutxaga txakolin xuria, Bizkaiko Txakolina jatorri izendapenari atxikia. Beraz, lehenengo eta behin zorionak Gurrutxagakoei, eta ondotik txakolingileei eta oro har euskal ardogintzari ere, euskal produktuak euren kalitateagatik, eta gero eta hobe egiten ari den merkaturatze eta zabalkundeari esker ere apreziatuak eta estimatuak baitira Estatu Batuetakoa bezain merkatu lehiakor eta zorrotza den batean.
2009/08/19
Kolonbiako Euskal Etxeak parte hartu du --Euskal Kulturaren ordezkari-- herrialde kolonbiarreko hiriburuan gauzatu den 'Feria Cultural Bogotá Internacional Espectacular' (Bogota Nazioarteko Kultur Ikuskizun Azoka) delakoan, Bogotá-ko Alkatetza Behineneko Idazkaritza Orokorreko Nazioarteko Harremanetarako Zuzendaritzak antolaturik "orain artean antolatua izan den kultura, arte agerpen eta gastronomia arloko bertako erakustaldirik handienean", beti ere "Bogotá eta gainerako kontinenteen arteko erlazioak eta loturak areagotzea helburu". Euskal Etxeak erakusgai eskaini zituen ekimenen artean, Euskal Herriari buruzko Argazki Erakusketa Handi bat eta, bertakoa baita ere, 'Munduko Umeak' abesbatza euskal kolonbiarra, azken honek euskarazko bost kantu eta Euskal Herriko dantza bat oholeratu zituela.
2009/08/19
Lapridako 'Lagunen Etxea' Euskal Etxeak erregin berria hautatu du joan den asteburuan. Koroatua Martina Larraza izan da, euskal etxe lapridatarra bere 20. urteurrena ospatzen ari den urte honetan. Izendapena egiterakoan, EEko Zuzendaritza Batzordekoek dantzari gaztearen tasunak utzi dituzte agerian eta azpimarratu dute euskal dantzei eskaintzen dien denbora eta maitasuna. Joan den larunbatean hautatua izan bada ere, aurkezpen ofiziala Lapridako gizartearen aurrean irailaren 16an izango da, Lapridako partido/barrutiak bere 120. urteurreneko kabalkada egingo duenean. Lerro hauetatik zorionak erregin berriari eta baita berriz ere EEkoei, bi hamarkada hauetako ibilbideagatik.
2009/08/18
Igandetik astelehenerako gauean hil da Argentinako Paraná hirian Raul Alcain, 96 urteko euskal argentinarra, familia zabal bateko aitona eta birraitona, bere ondoko guztiak euskal erroekiko zaletasunean eta errespetuan hezi zituena, pertsonalki engaiamenduzko etsenplua emanez euskal kultura, identitate eta sentimentuarekiko. Bere gorpua gaur asteartea abuztuak 18 erraustuko da, goizeko 11etan, Paranako Udal Hilerrian. Lerro hauek baliatu nahi ditugu bere familia eta lagunei besarkada bero bat bidaltzeko, baita Presencia Vascako lankideei ere. Goian Bego.
2009/08/18
Arrakastaz ospatu berri ditu Quebec-eko Trois-Pistoles herriko 'Parc de l'Aventure Basque' (PABA) delakoak bere euskal jaiak, euskal musika, janaria, kirolak eta oro har euskal giroak bi mila bat jende ekarri dituela, antolatzaileen esanetan. Azkeneko urteotan egin gabe, aurtengo arrakastak indarrak biziberrituko ditu. Musikaz aparte --euskal txaranga batek, besteak beste, girotu zuen festa-- herri kirolak izan dira deialdiko protagonista nagusia, horien artean pilota txapelketa eta erakustaldiak, Parc-eko kantxa gertaleku. Baina euskal festak ez dira batere ahitu Amerika Iparraldeko eremuan, aste honetan bertan hasiko baitira St. Pierre et Miquelon-goak, hemen ere pilota, herri kirolak, musika, janaria, dantzak eta kantuak protagonista. Igandera arte luzatuko dira euskal tradizio handiko atlantiar uharteotan.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
