euskal diaspora eta kultura
2010/10/21
Elizondo deituradunen Nazioarteko VI. Bilera datorren asteburuan --urriaren 22tik 24ra-- egingo da Saltillon, Mexikoko Coahuila estatuko hiriburuan. Elizondo deituradun talde batek, 'Colegio de Demografía de Nueva Vizcaya' delakoarekin batera antolatuta topaketako egitarauak hitzaldi eta saioak biltzen ditu genealogiaz, Elizondotarren jatorriez, familiako pertsonaia historikoez eta baita irteeraren bat ere, saioen egoitza gisa bi leku hartuko dituela: Coahuilako Unibertsitate Autonomoa eta Saltilloko Udal Artxiboa.
2010/10/21
Argentinako Buenos Aires probintzian dagoen Lapridako Euskal Etxeko amek omenaldi beroa jaso zuten joan den larunbatean, urriaren 16ean, elkarteko egoitzan. Euskal etxeko Pilota Azpi-Batzordeak antolatu zuen afaria eta bazkide askok bat egin zuten deialdiarekin, amei merezitako aintzat-hartzea egin eta giroaz gozatzeko.
2010/10/20
Eusko Ikaskuntzak ENE saria banatuko du aurten ere Euskararen Nazioarteko Egunean, abenduaren 3an. Bostgarren edizioa izango da jada eta Euskal Herritik kanpo euskararen alde egiten duten erakundeak saritzea du helburu ekimenak. Hautagairen bat aurkeztu nahi duenak azaroaren 25a arte du epea. Iaz, NABOk, Ipar Ameriketako Euskal Etxeen Elkarteak jaso zuen. Saria merezi duen talderik ezagutzen al duzu? Bidali bada proposamena!
2010/10/20
Euskaldunek Kuban duten presentziaren jatorria, europarrak Karibera heldu ziren garaikoa da. Ordutik, euskaldun ugarik zapaldu dituzte Kubako lurrak: abenturazaleek eta soldaduek, ondokoek eta marinelek, kortsarioek eta piratek, emigranteek eta erbesteratuek, militarrek eta koroaren funtzionarioek, eta, noski, Elizako pertsona ugarik. Josemi Arrugaetak euskaldunek Kuban izan zuten eragina eta Kubak Euskal Herriarekin duen harreman estua jasotzen du Berria egunkariak argitaratutako artikulu honetan.
2010/10/20
Markinan jaioa, bost urte zituela Maria Luisa Laka euskaltzalea Venezuelara mugitu zen bere familiarekin, eta bertan bizi izan zen 16 urterekin batxillergo ikasketak burutzera jaioterrira itzuli zen arte. Geroztik hizkuntza irakasle gisa gailendu da --euskaraz eta gaztelaniaz ezezik ingelesez, alemanez eta frantsesez egiten du-- eta Bilboko Juan Mateo Zabala eusketgiko fundatzaileetakoa izan zen. Euskara irakasleen irakasle izan da eta ikasle izan dituenen artean aipa daitezke Juan Jose Zearreta, Mikel Zarate, Alfonso Irigoien, Rikardo Badiola eta Bernardo Atxaga. Maria Luisa Lakarekin batera, Jaurlaritzaren 'Lan Onari' saria jasoko dute Manu Leguineche kazetariak, Imanol Arias aktoreak, Javier Ormazabal enpresariak, eta Xabi Alonso futbolariak.
2010/10/20
“Topaketaren helburua umeek Euskal Herriko kultura --dantzak, jokoak, musika, antzerkia, eskulanak eta euskara-- ezagutzea da. Aldi berean mutiko eta neskatoen arteko harremanak sortu eta sendotzearen aldeko jaia ere bada”, azaldu diote FEVAko euskara arloko arduradunek EuskalKultura.com-i. Federazio argentinarra bera da topaketaren antolatzailea, HABEtik jasotzen duen diru-laguntzarekin. Aurten 200 bat neska-mutilek hartu dute parte Topaketaren 13. edizioan eta, urtero bezala, egun aparta pasatu dute Llavallolgo Euskal Echea Institutuko zelaietan.
2010/10/19
Urriaren 21ean hasi eta Azaroaren 4ra bitarte, Berri Txarrak taldeak bira berri bati ekingo Asian zehar, Txina, Korea eta Japonia ikutuz. Lekunberrikoek euren azken lana, "Payola", aurkeztuko dute, Galder Izagirre bateriajole berriarekin. Txinan Pengyu, Macau eta Hong Kong izango dira bisitatuko dituzten hiritzarrak. Hego Koreako hiriburuan 3 kontzertu datoz jarraian. Eta biraren amaieran Japonia, Brahman bertako talde ezagunarekin batera. Hirugarren aldia du Berri Txarrak-ek Japonian. Oraingoan, ordea, hegoaldeko eremua izango dute jomuga: Kagoshima eta Oita-Shi, hain zuzen ere.
2010/10/19
AEBetako euskal kantari eta bertsolariek bat egin zuten joan den urriaren 9an Rocklinen, NABOren 2010eko Kantari Egunean. 'Iparreko Ibarra' euskal etxe kaliforniar gazteak antolatu zuen jaia, bertako urteroko Euskal Bestarekin eta NABOren udazkeneko bilkurarekin bat eginik. Partehartzaileek euskal kantuak Estatu Batuetan lor dezakeen sasoi ona agertu zuten, oraina ez ezik etorkizuna ere izan dezakeela erakutsiz: kantari aritu zen gazteenak, Ambroise Curutchague-Clark-ek, zortzi urte baino ez ditu.
2010/10/19
Jende gehienak Madrilgo Txistu eta 'Asador Donostiarra' jatetxe ezagunen sukaldari eta fundatzaile izan zelako ezagutzen dute. Nafarroako Lerinen 1927an jaioa, bere biografia Donostiari ere badago lotua, eta baita Venezuelari ere, Julia Almeida Zapirain donostiarrarekin ezkondu ondoren Caracasen bizi eta lan egin baitzuen zenbait urtez, ondoren atzera egin eta Madrilen bizitzen jartzeko, espainiar hiriburukoen artean ospetsuenen artean kokatzen diren bere jatetxeak sortu eta kudeatzeko. Atzo, Nafarroako Gobernuak, bere ibilbide osoko ahalegina eta sorterriko 'enbaxadari' lana onesteko Xabierreko Frantzisko Saria eman zion.
2010/10/19
Shanghaiko Erakusketak eta Patxi Lopez lehendakariak berriki Txinara egin duen bidaiak komuinikabideetara ekarri dute herrialde honetan bizi den euskal komunitatea. Txinan bizi diren euskaldun asko eta asko bertako enpresetan lan egiten duten profesional gazteak dira. Baina badago besterik ere. Diario de Noticias de Gipuzkoa egunkariak hiru lagunei egin die elkarrizketa: Aitor Azkue, Euskal Etxeko presidente berria; Estibalitz Gete, Euskal Etxeko presidente ohia, eta Ion Alaña, Shanghaiko Kuluska tabernako sukaldaria. Jarraian elkarrizketak laburtu eta euskaratu ditugu.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
