euskal diaspora eta kultura
2008/10/02
Elkarteko barne araudiak dioenari jarraiki, bildua da Chacabuco herri argentinarreko 'Guillermo Larregui' Euskal Etxeko Ohiko Bitzar Nagusia, eta bozkak egin ditu datorren agintaldirako Zuzendaritza Batzordeko kideak hautatzeko, Eduardo Izurieta hautatuz lehendakari, Juan Carlos Zubeldia lehendakariorde, Elvira Guruceaga idazkari eta Sonia Armendariz diruzain, besteak beste.
2008/10/01
Argentinako euskal komunitateak Mercedes hiriko eskola teknikoari berebiziko oparia egin dio, Eusko Jaurlaritzak sustatzen duen programa bati esker: neska-mutilen lanbide heziketa tailerretarako bigarren eskuko fresatzeko makina, Euskal Herrian gehiago erabiltzen ez dena, baina Argentinako formakuntza zentroetan etekin handikoa dena. Jaurlaritzak, Argentinako euskal etxeen laguntzaz, horrelako hainbat dohaintza egin ditu aurten. Ekitaldian Suipachako Euskal Etxeko ordezkariak, eskolako zuzendariak eta Jaurlaritzaren ordezkari gisa, Cesar Arrondo irakaslea izan ziren.
2008/10/01
Euskal Kultur Erakundeak eta Antic-Pays Basque informazioaren gizartea sustatzeko agentziak 'Artean' gune birtuala sortu dute. Ekimen erabat berritzaile honi esker euskal kultura Second Life animaziozko mundu birtualaren barruan present egoteko erabilpena abian jarri da: Pays Basque uhartea du izena. Gaur asteazkena, urriaren lehena, arratsaldeko bostetatik bederatzietara lehen hitzordu bat antolatu da 'Pays Basque uhartea'-n, gunearen aurkezpen modura. Bere baitan ikusentzunezko edukiak aurkitu ahal izango dira, hala nola poesia, ipuinak, dantzak ...
2008/10/01
Gernikako Bakearen Museoa VI. Nazioarteko Bake Museoen Topaketan izango da gaur hasten den urriaren 5etik 10era, Japoniako Kyoto eta Hiroshima hirietan. Hiru urtetan behin egiten da topaketa hau eta bertan munduko ehundik gora bake museo bilduko dira. Iratxe Momoitio, Gernikako museoko zuzendaria, Nagasaki hirira helduko da gaur eta hiri honetako Oroimenaren Museoa bisitatuko du. Mintegian Momoitiok bi mintzaldi eskainiko ditu eta hilaren 11an Tokyon Gernikako bonbardaketari buruzko hitzaldia emango du.
2008/09/30
2008ko uztaila. Azpeitiko plazan jende ugari dago tabladura begira. Gainean, dantzari batzuk ari dira jo eta ke. Gazte Alai dantza taldea da, euskaldunak dira, Necocheakoak, Argentinakoak. Ikusmena eszenatokian jarrita daukagu, burua berriz Necochean. Nolako harrera egin ziguten! 2005eko San Fermin bezperan, Euskal Etxera bederatzi euskaldun iritsi ginen. Bidaia luzeak nekatuta eta era berean ilusioz beteta, euskara, esku pilota, gastronomia, euskal dantzak… erakusteko asmoz. Aurreskuarekin egin ziguten harrera hunkigarria eta gero banan banan agurtu gintuzten ehun bat lagunek. Deskantsu premia latza genuenez, bakoitza bere familiarekin erretiratu zen eta hurrengo egunerako hitzordua jarri Euskal Etxean bertan.
2008/09/30
Aurtengo uztailean eta lehen aldiz, Euskal Herrian bildu dira 2004az geroztik Hator Hona programan Argentinarako bidaiatutako gazte euskaldunak eta Necochean hartu zituzten euskal-argentinarrak. Edizio bakoitzean Euskal Herriko hamar bat neska-mutilek Necochearaino heldu ziren, bertako euskal etxean euskara, dantza, pilota, txalaparta... erakusteko Necocheako gazteei. Egonaldi horietan sortu ziren adiskidetasun eta harreman estuak ekimenaren arrakastaren seinale bihurtu dira. Joan den uztailean euskal etxeko hartako hogei bat neska-mutilak euren ametsa bete eta Euskal Herrira etorri ziren, Gazte Alai dantza talde gisa erakustaldiak eman eta euskal lagunekin berriz topatzeko.
2008/09/29
Miguel de Unamunoren egunean, Bilboko izen bereko plazan lore-eskaintza eta ohorezko aurreskua gauzatu dira, Azkuna alkatearen aldarrikapen batekin, eta hitzaldi bat arratsaldean, Deustuko Jose Antonio Ereño irakaslea eta Miguel de Unamuno Adarraga, filosofoaren biloba, partaide. Gaur baita ere, Bilboko Udalak X. Miguel de Unamuno saiakerarako deia zabaldu du, euskaraz zein gaztelaniaz, 7.000 euroko sari banarekin. Epea azaroaren 28an bukatuko da.
2008/09/29
Telebista parte hartzailearen premisa xede dutela eta webgunea berrituta hasi dira berriz Kanaldude telebistan lanean, udan bideorik eskaini gabe egon ondoren. Horrek ez du esan nahi geldirik egon direnik, eta irail honetan jarri dituzte dagoeneko euren webgunean sei bideo, horietariko bat Kaliforniako Noka taldeak Euskal Herrira egindako bisita erakusten duelarik. Historia zabala duen internet bidezko telebista honek proiektu frango lituzke buruan, telebista herritarrengana zabaltzeaz gain, Lapurdi, Nafarroa Beherea eta Zuberoan telebista kate bat sortzea, Lapurdiko kostaldean iada lanean dabilen ITelebistarekin elkarlanean.
2008/09/29
General Villegas-eko Euskal Etxeko kideak gero eta hurbilago daukate euren ekimen ugarien aterpe izango den eraikin egoki bat eskuratzeko ametsa, izan ere, joan den abuztuan hasi baitziren egoitza berria altxatzen. Nahiz eta oraindik goiz den lanen amaiera-datarik ipintzeko, buru belarri hasi dira lanean eta laster eraikinak bere burdinezko egitura eta teilatua izango ditu.
2008/09/26
Angeluko Argileak koroa Quebec aldean izan da abuztuan, lurralde honen sortzearen 400 urteurreneko ekitaldietan parte hartzeko gonbitea jaso ostean. Ipar Ameriketako herri honen historian euskaldunek izan dute zerikusirik eta harreman hori berreskuratu eta omentzeko asmoarekin antolatu zen euskal kantarien bidaia. Quebec-en eta Montrealen izan ziren kantariak eta bertako euskaldunekin biltzeko parada izan zuten, EuskalKultura.com-ek aurreko artikuluetan agertu zuenez. Jarraian, informazio hori biribiltzeko, Herria astekariak aste honetan plazaratu duen artikulua.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
