euskal diaspora eta kultura
2008/11/12
Badaramatza iada lau bat urte sarean. Zientzia, euskal literatura, historia eta arteei buruzko gurutzegramak, flash jokoak, beste erabiltzaileekin 'on-line' jokatzeko aukera ematen duten galdera jokoak --tartean munduko geografiari buruzko eta Euskal Herriko zuhaitzei buruzko galderen jokoak eta abilidade jokoak-- aurki daitezke bertan. Plazagunea enpresak sortutako webgune hau interneteko euskal erabiltzaileak entretenitzeko asmoarekin jaio zen eta azken urte honetan eguneko 300 bat bisita izaten ari da. Mundu osoko erabiltzaileak biltzen ditu, joku berean lagun bat baino gehiagok jokatzeko aukera eskaintzen baitu.
2008/11/12
Arantxa Urretabizkaia eta Edorta Jimenez idazleak Alemania aldera abiatuko dira ostiralean, asteburuan zehar bi eleberri aurkezteko Nürnberg eta Wiesbaden hirietan. Bira Bost Kultura taldeak eta Pahl-Rugenstein argitaletxeak antolatu dute. Argitaletxe honek euskal literatur lanak argitaratzen ditu alemanieraz, Zubiak izeneko bildumaren barruan. Iaz Urretabizkaiaren 'Kuaderno gorria' ('Das rote Heft', alemanieraz) eta Jimenezen 'Kilkerren hotsak' ('Der Lahm der Grillen', itzulita) argitaratu zituen. Iaz ere izan ziren bi egileak Alemanian euren lana aurkezten, eta alemaniar irakurleen harrera onak lagunduta, aurten ere zuzenean aurkezteko aukera izango dute.
2008/11/11
Zuzendaritza Batzordea berritu du Argentinan, La Pampa probintziako General Acha herriko 'Euzko Txokoa' Euskal Etxeak bere Urteko Ohiko Biltzarra egin ondotik. Bozken ondoren hautatua izan den Batzordeak Luis Alberto Obietak dauka buru, lehendakari legez, berarekin batera batzordekide daudela, besteak beste, Carlos José Ruiz, lehendakariorde; Daniel O. Fernandez, idazkari; eta Carlos Daniel Pastor, diruzain.
2008/11/11
Euren jarduna mundura zabaldu nahi duten euskal enpresek aholkulari bikainak izango dituzte bihar eta etzi Bilbon SPRIk (Industriaren Sustapen eta Eraldaketarako Baltzua) egingo duen topaketan. Intergune du izena bilkura honek eta hirugarren edizio honetan SPRIk munduan zehar 51 herrialdeetan dituen aholkularitza eta sustatze bulegoetako arduradunak bertan izango dira, herrialde horietara zabaldu nahi duten enpresei aholkuak eta laguntza emateko asmoz.
2008/11/11
Joan den urriaren 30ean Eusko Jaurlaritzako Lehendakaritza Saileko eta Argentinako Barne Saileko ordezkariek Lankidetza eta Asistentzia protokolo bat sinatu zuten Buenos Airesen, marko instituzional bat finkatuz ahalbidetzeko elkarrekiko asistentzia eta aholkularitza egitarauak euren jatorrizko herrialdeetan egin daitezkeen herritar prozesuetan beste herrialdean bizi diren euskal eta argentinar herritarrentzat. Buenos Airesetik, FEVA Euskal Argentinar Erakundeen Federazioak deitu egin du sinatutakoari zabalkunde handiena emateko. Hona osorik protokoloaren testua.
2008/11/11
Montevideoko Haize Hegoa elkarteak Jose Bergamin poeta eta antzerkigilearen omenezko ekitaldia egin zuen joan den ostegunean, azaroaren 6ean, 'errepublikar meneraezin' eta euskaldunen lagun handi honen ekarpena gogoratuz. Bergamin Uruguaien erbesteratuta egon zen bi aldiz eta lagun eta jarraitzaile asko utzi zituen. Ekitaldian hizlari Alicia Cagnasso, ”El exilio de José Bergamín en Uruguay” liburuaren egilea; Rezo Pi Hugarte, antropologoa, Bergaminen ikasle eta laguna izandakoa, eta José Félix Azurmendi kazetaria, Nazioarteko Eitb-ren zuzendaria izan ziren. 'Zirraraz eta pasadizo alaiez beteriko ekitaldia izan da', horrela laburtu zuen mintzaldia Haize Hegoako presidente Enrique Poittevinek.
2008/11/10
Euskal Astean dantzak nagusi diren arren, beste proposamen kultural batzuk ere euren lekua eskuratzen ari dira azken urteetan. Argazki eta pintura erakusketak, pilota partidak, zinea, hitzaldiak eta liburu aurkezpenak aipa ditzakegu horien artean. Aurten berri bat gehitu zaie: La Platako Euzko Etxeak antolatu zuen Abesbatzen Bilkura. Bost euskal etxeetako koruek hartu zuten partelehen bilkura honetan: Villa Mercedes, Tandil, Villa María, Rosario eta, jakina, La Platako anfitrioiak. Taldeek erakustaldi bikaina eskaini zuten eta bukatzeko denek elkarrekin kantatu zuten “Kinkirri kunkurru” abestia. “Zoritxarrez ez da horrelako topaketarik egiten euskal aste guztietan; gu, ordea, harro gaude abesbatzei lekua eman izanaz. Talde hauek lan gogorra egiten dute eta merezi dute euskal asteetan parte hartzea", azaldu zion EuskalKultura.com-i Maria Evangelina Bertolak, Euzko Etxeako abestabatzaren zuzendariak.
2008/11/10
Cancun hiri mexikarra eta bertako Rincón Rupestre Kolektiboaren Kultura Etxea biltoki eta bilgune bilakatu ziren joan den urriaren 31ean, ostirala, Maia eta Euskal hizkuntza eta kulturak elkar hobeto ezagutu eta elkarren esperientzien datuak trukatuz eta bi egoerei buruz solasteko. Bertaratutakoek azpimarratu zutenez, amankomunean daukate, hasteko, kultura txikientzat gero eta erasokorrago eta unimormatzaileagoa den munduan eutsi ahal izan diotela eta bizitzen segitzeko asmoz dihardutela.
2008/11/10
Abenduaren 23an jokatuko du Euskadiko futbol selekzioak gabonetan eta urtero legez jokatu ohi duen partida, Iranen aurka, Bilbon, San Mames futbol zelaian, azken egunotan Euskadiko Futbol Federazioak aditzera eman duenez. Iraneko selekzioan Osasunan ari diren bi jokalari ari dira: Javad Nekounam eta Masud Shojaei. Esan, aldi berean, iaz lehen aldiz jokatu zuela selekzioak Euskal Herria izenarekin, baina, Euskadiko Futbol Federazioaren erabakiz, Euskadi izenarekin jokatuko dutela aurten, berriz ere.
2008/11/07
Sebastianek 'Wiskott-Aldrich Sindromea' (WAS) deritzon gaixotasuna du eta bere bizitza arrisku larrian dago hezurmuin transplantea egin ahal izateko emaile egokia aurkitu ezean. Medikuen esanetan emaile egokia aurkitzea errazagoa izango da euskal komunitatearen baitan eta bere ingurukoek laguntza deialdia luzatu diete munduko euskaldunei. Lagundu nahi dutenek hezurmuin emaile egin daitezke, Euskal Herrian, AEBetan, Argentinan... (munduko herrialde guztiak hezurmuin emaileen nazioarteko datu-base bakarrean daude koordinatuta) eta emaile egokia agertuz gero transplantea egin ahal izango da. Ipar Amerikako Euskal Federazioak (NABO) premiazko deialdia egin die bere elkarteko kideei, eta emaileak egiteko ekitaldi berezia antolatu du bihar Renon egingo duen bilkura baliatuz.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
