euskal diaspora eta kultura
2015/03/23
Ezaguna da Amaya Arberas soprano donostiarra Ameriketako diasporarentzat. 2010ean, Ellis Island-eko euskal erakusketari eman zion hasiera eta, hiru urte geroago New Yorkeko Eusko Etxearen Mendeurrenean ere kantatu zuen. Izarren eta barren herrialdean eman dituen zuzeneko andanetako bi baino ez dira horiek, baina. Bera izan ohi da bere buruaren agente, programak kontratatzeko-eta: “Nekeza da, baina gustatzen zait; gainera, aurrera egiteko modu bakarra da egun”, esan dio EuskalKultura.com-i.
2015/03/23
Ostegunean abiatu zen Korrika 19 Urepeletik, eta Euskal Herrian ehundaka kilometro egin ahala, munduan zehar inoiz baino urrunago heldu da euskararen aldeko oihua, Diasporako euskaldunei esker. Hegoafrikan, Saharan, Nikaraguan, Australian, Mexikon... ozen eta argi entzun da euskaraz bizi nahi dutenen aldarria. Jarraian, bideoak eta argazkiak.
2015/03/23
Iñigo Rementaria gernikarra genealogian aditua da eta iaz "Gure Abi Izenak" ikerketa eskaini zigun, EuskalKultura.com-eko irakurleekin partekatzeko. Liburu horretan Rementeriak hainbat euskal abizenen sorburua diren Bizkaiko eta Gipuzkoako baserriak bildu ditu. Orain, urrats berri batean, Arabako datuekin osatu du lana eta beste behin ere EuskalKultura.com-eko irakurleentzako eskuragarri jarri ditu.
2015/03/20
Valentzian bizi da Gemma Sanginés Sáez psikologo bilbotarra, bertan finkatua eta familia sortua, bi alabak bertako valentzierarekin batera euskara ere ikasi dutelarik. Izan ere, alabak Valentzian euskaldun ere haz zitezen Euskaltzaleok elkartean murgildu eta engaiatu zen Gemma. Valentzian Falla egunetan dabiltza egunotan eta horregatik datorren larunbaterako egin dute deia euskaltzale valentziarrek, Korrikarekin bat egiteko. Euskal Herriko eta bertako dantzari, musikari eta artisten babesa izango dute.
2015/03/20
Korrikaren ekitaldia milaka lagun biltzen dituen Gizataldeen Sukaldaritza Gunea esparru gisa baliatuz antolatu zuten Argentinako hiriburuko euskaltzaleek, ahalik eta pertsona gehienen artean hedatu ahal izateko. Eta orain astebete, martxoaren 14an egin zuen. Hori ez zen izan, ordea, euskal kolektibitatearen erakarpen bakarra jaialdi honetan; Euskaltzaleak eta Laurak Bat euskal etxeen standetan, musika, dantzak eta nola ez, goi mailako proposamen gastronomikoak ere eskaini ziren.
2015/03/20
91 urterekin, oso jarrera aktiboa du Clelia ‘Kela’ Gorrik Pehuajoko Etxe Alai euskal etxean, eta euskal etxearen alde lan egin behar denean. Izan ere, oraindik ere hartzen du parte instituzioko jardueretan eta garrantzi handiko erreferente bihurtu da hiriko euskal gizatalde barnean eta baita areago ere.
2015/03/19
Tokian tokiko kutsua hartzen du Diasporan zehar euskararen aldeko lasterketak eta Necochearen kasuan hondartzaraino ere iritsiko da. Hitzordua igande honetan, martxoaren 22an da, goizeko 11etan, eta bukatzean piknika egingo dute korrikalariek Miguel Lillo Parkean. Euskal elkarteak bere 70. urtebetetzeko afaria apirilaren 18an egingo duela ere iragarri du Necocheako Euzko Etxeak.
2015/03/19
Ekitaldia larunbat honetan izango da eta herriko eskola katolikoarentzat dirua biltzea du helburu.
Rupert-eko (Idaho, AEB) Nikolas Deunaren Emakume Katolikoen Elkarteak, beste urte batez, herriko eskola katolikoaren aldeko diru bilketa afaria antolatu du. 57. edizioa hilaren 21ean ospatuko dute, Rupert Elks Lodge eraikinean, ohi legez. Afaria eta enkanteaz gain, zozketa eta kontzertua ere iragarri dute kartelean. Oso ekitaldi arrakastatsua izan ohi da hau, izatez, azken urteotan, 40.000 dolar inguru jaso izan dituzte afari bakoitzean. “Zorte handia dugu ditugun herrikideak izanda, denek lagundu nahi dutelako, ez soilik euskaldun eta katolikoek”, adierazi du Cyndy Berlin-Lantz antolatzaileak, EuskalKultura.com-ekin berba eginez.
2015/03/18
Badator, hemen da Korrika 19 eta Euskal Herriko korrilariak bihar Urepelen ekingo diote euskararen eta AEKren euskaltegien aldeko lasterketari. Martxoaren 29a bitartean zazpi probintziak alderik alde zeharkatuko ditu lasterketak, gauez eta egunez, gelditu barik. Diasporan, aldiz, hasiak dira dagoeneko ekimen honen aldeko ekitaldiak eta datozen egunetan ere egingo dira makinatxo bat jarduera. Jarraian Diasporako Korrikak eman dituen argazkien bilduma eta datorrenaren berri.
2015/03/18
Joan den igandean eman zuen Brooklyn-go Our Lady of Refuge elizan emanaldia organo jotzaile oriotarrak. Bertako laurogei urteko organoaren konponketak ospatzeko –eta, bide batez, diruz laguntzeko− bederatzi kontzertuetako azken aurrekoa izan zen berea eta “esperientzia izugarria” izan zela adierazi dio EuskalKultura.com-i. “Etxean bezala sentiarazi naute, beteta zegoen eliza eta itzultzeko eskatu didate. Oso pozik nago”, esan du.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
