euskal diaspora eta kultura
2015/11/20
Pariseko erasoen osteko emergentzia egoera dela eta, Eskual Etxeak bertan behera utzi ditu hainbat jarduera. Elkarteak gertutik sufritu ditu atentatuak, izan ere, nesken errugbi taldeko entrenatzaileak tiro bat jaso zuen bizkarrean Bataclan aretoan. Zorionez, ospitalean sendatzen ari da. Atentatuen izua zuzen zuzenean bizi izan zuen ere Vanessa Manjarrez ikasle euskal-kaliforniarrak, Saint Denis estadioan baitzegoen kanpokaldean bonba batek eztanda egin zuenean.
2015/11/20
Abenduaren 3an ospatzen da Euskararen Nazioarteko Eguna. Donostian, Euskal Herriko beste hainat tokitan bezala, dagoeneko hasi dira girotze lanekin, eta asteburu honetatik aurrera hainbat jarduera egingo dituzte euskara ardatz hartuta. 150 jarduera biltzen dituen egitarau zabala prestatu dute aurten, eta atzo egin dute aurkezpena Udaletxean. Irutxuloko Hitzak argitara emaniko artikulua.
2015/11/20
Buenos Aires Han diko Askatasunaren Bidea elkarteak antolaturik eta 2015eko San Miguel hiriko Euskal Zine zikloari amaiera emateko, ‘80 Egunean’ filma proiektatuko dute bihar, arratsaldeko 7etan, Sarmiento Liburutegian. Datozen asteetako ekintzen programa abenduaren 5era arte luzatuko da, dantzak, hitzaldia eta Euskararen Nazioarteko Eguneko ospakizuna barne.
2015/11/19
Santiagoko Euzko Etxeak gaur jarriko du abian 2015eko Euskal Astea, elkartearen egoitzan egingo den harrera ekitaldi batekin. Bertan, besteak beste, Bizkaiko Diputatu Nagusia, Unai Rementeria izango da. Rementeria bisita ofiziala egiten ari da Txilera, zenbait euskal enpresariekin, eta ordezkaritza honek Euskal Asteko ekitaldietan parte hartuko du. Igandera bitartean egiterau zabala izango da, tartean, kontzertuak, Olinpiadak, Korrika Txikia eta askoz gehiago.
2015/11/19
Wyoming-dik etorririk, David Romtvedt eta bere alaba Caitlin Romtvedt-ek euskal eta nazioarteko zenbait musika emanaldi eskainiko dituzte gaur eta bihar Idahoko hiriburuan, Boise State University-k (BSU) urtero antolatu ohi duen Nazioarteko Astearen baitan.Musikari trebe eta trebatuak dira aita-alaba eta, besteak beste, The Fire Ants" taldeko partaide. Euskal musikaz gain, kataluniarra, portugaldarra, frantsesa eta espainiarra ere landuko dituzte emanaldiotan.
2015/11/19
200dik gora lagun bildu ziren Chascomuseko Pilota Klubean Euskal Jaian parte hartzeko, tartean Cañuelasko dantza taldea. Festaren baitan, 2015-2016 eperako etxeko alkatea izendatu zuen Zingirako Euskaldunak-eko batzordeak; hautatua, Graciela Basterra izen zen. Berri honekin batera, chascomustarrek 2016ko Udalekuren data iragarri dute: ekitaldia 2016ko urtarrilaren 5tik 9ra izango da.
2015/11/18
EuskalKultura.com-ek zozketatzen duen proiektagailuaren zozketan parte hartzeko azken epea larunbat honetan bukatuko da, 24:00etan (Euskal Herriko ordua). Ordura arte, zabalik daukazu epea proiektagailua zein euskal etxerentzat izango den esateko. Zure emaila ateratzen bada, zeure izenean emango zaio saria hautatutako euskal etxeari. Oraindik bozkatu ez baduzu, ez utzi gerorako eta egiozu oraintxe. Adi parte hartzeko arauei, eta zorte on! Emaitzak astelehenean argitaratuko ditugu.
2015/11/18
Mexikoko Euskalerriaren Adiskideen Elkarteak eta Jose Maria Basagoiti Noriega Artxibategi Historikoak antolatuta, Mexiko eta Euskadiren arteko kultur topaketa egingo da azaroaren 26an Mexiko DFko "Vizcainas" ikastetxe historikoan. Topaketaren helburua euskal kulturak Mexikon duen presentzia eta eraginari buruz hausnarketa egitea da.
2015/11/18
‘Euskara Argentinan. Euskararen pausoen atzetik’ erakusketaren aurkezte ekitaldia Liburutegi Nazionalean izan zen, bertako zuzendari Horacio Gonzalez, FEVAko lehendakari Hugo Andiazabal eta Euskadiren Argentinako ordezkari Sara Pagola partaide. Erakusketa azaroaren 9ra arte bisitatu ahal izango da, goizeko 9etatik gaueko 9etara, ‘Juan L. Ortiz’ aretoan.
2015/11/17
Benetako istorio batean oinarrituta, Josunerena, ‘Gu, nosotros’ ikuskizunak Euskal Herritik Argentinara iritsi ziren hainbat etorkinen historia irudikatzen du. Emankizunean zehar, Josune neskatoaren bizitza antzeztuko dute Union Vasca euskal etxeko adin guztietako dantzariek, euskal eta argentinar folklorea bilduz. Emanaldia bihar da, iluntzeko 8:30etan, Bahia Blancako Udal Antzokian.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
