euskal diaspora eta kultura
2013/06/24
Urtero bezala aurten ere Mus Txapelketa Nazionala egingo du Argentinak . Hitzordua abuztuaren 17, 18 eta 19an izango da eta lehiaketak Txileko Mundialera joango diren ordezkari argentinarrak hautatuko ditu. Lehiaketaren XXXV. edizio hau Buenos Aires probintziako Saladillo hirian izango da, bertako Itxaropen Euskal Etxea antolatzaile. Ekitaldia euskal erakundearen 15. urteurren programaren baitan gauzatuko da eta vaucherrak ordaintzeko epea abuztuaren 9an bukatuko da.
2013/06/21
Urte bateko ebaluatze prozesuaren ondoren eta 5 urteko lanari esker, ICANNek .eus domeinua onartu du. Irabazi-asmorik gabeko erakunde honek Interneteko domeinuak eta IP helbideak ematen ditu. Domeinu honek aurrekari bat dauka: 2005ean onartu zen .cat, katalanez. Gaur aurkezpen ekitaldi ofiziala egingo dute EHUn eta, besteak beste, Lehendakaria egongo da bertan.
2013/06/21
Musikaren Besta ospatzen da gaur munduan zehar eta hainbat euskal etxek eta Diasporako abesbatzek ekitaldiarekin bat egingo dute. Frantzian egun hau ospatzeko ohiturak indar handia du eta, esaterako, Parisen eta Bordelen egingo diren zenbait ekitaldiren berri jaso dugu. Frantziako hiriburuan Anaiki gizonezkoen abesbatzak kontzertua emango du Notre Dame du Travail elizan, Neskatxenean emakumeen koruarekin batera. Bordelen, Euskaldunen Biltzarra elkarteak beste egitarau zabala antolatu du, urtero legez, Place des Basques enparantzan.
2013/06/21
Euskal etxean garatzen diren aktibitate guztietako partaideen bilgarri antolatu du 2013 honetan ere Paella Lehiaketa La Platako Euzko Etxeak. Deialdia, gainera, aurreko edizioetakoa baino zabalagoa izan da eta etxeko taldeez gain hiriko Atenas Clubeko sukaldariek ere hartu dute parte. Berri honekin batera, Euzko Etxea-tik jakinarazi dute Roxana Aramburu eta Diana Amiama idazleen bisitarekin ospatu zuela euskal elkarteko Matxin Burdin Liburutegiak ‘Liburuaren Eguna’.
2013/06/20
Iragan igandean hasi zen Bakersfield-en Ipar Ameriketako euskal elkarteen federazioak, NABOk, urtero antolatzen duen gazteen Udalekua. Ekimena oso arrakastatsua da eta aurten, bertan inoiz baino neska-mutil gehiago ari dira partehartzen: ehun. Eta beste makina bat gazte gelditu dira sartu ezinik, tartean Euskal Herriko batzuk ere bai. Bi aste egingo dituzte Kalifornian, euskal kulturan murgilduz eta txistua, dantza, euskara eta musa ikasten, besteak beste.
2013/06/20
2010ean bere jaioterri Coronel Moldes-en aurkeztu ondoren, beste herri askotara hedatzeko gonbitea jaso zuen Marita Echave “Euskal Baserrietako Sukaldaritza” liburuaren egileak. Luburuaren eskutik, euskal etxe anitz bisitatu ditu azken bi urte hauetan eta guztietan sutondoan ikasitako errezetak kontatu eta prestatu ditu. Bidaia luze honen baitan San Juan hirira iritsi da sukaldari cordobatarra joan den asteburuan bere sukaldeko sekretuak bertako euskal etxeko kideekin konpartitzeko. Ekitaldia bi zatitan antolatu zen, liburuaren aurkezpena eta errezeten prestaketa, eta publikoak oso harrera ona eman zien biei.
2013/06/19
Igandean abiatu ziren Quebec-eko Trois Pistoles herritik Indianoak 2013 espedizioko arraunlariak. Ibaialde elkarte lapurtarrak eta Quebeceko Euskaldunak Euskal Etxeak antolatu duten egitasmo honetan Saint Laurence ibaian gora 500 kilometro egingo dituzte bidaiariek, antzinako baleazaleen antzera. Asteburuan bestea eta zenbait kultur ekitaldi egin ziren Trois Pistoleseko Parc de l'Aventure Basque en Amerique museoan. Horien baitan, Miq'mak herriko emakume batek trainerua babesteko zeremonia bat egin zuen. Gurari on horiekin, bidean dira Indianoak!
2013/06/19
Trikitia euskal musika tresna ezagunenetakoa bada ere, XIX. mendeko erdialdean heldu zen geurera, Euskal Herriko trenbideetan lan egitera etorri ziren langile italiarren eskutik. Orain, Unai Guerra zuzendariak euskal trikitilari talde bat eraman nahi du musika tresna honen sorterrira, eta bidaia "Trikifollia" izeneko road movie dokumentalean jasoko du. Ekainaren 29an irtetzekoak dira, baina horretarako finantziazioa behar dute. Crowfunding sistemaren bidez 5.000 euro bildu dituzte jada, baina azken bultzadatxoa falta zaie. Anima zaitez eta lagundu trikiti zale hauen ametsa betetzen!
2013/06/19
Hego hemisferioan neguari, iparrekoan udari. Buenos Aires probintziako bi herri hauetako euskal gizataldeek elkarrekin ospatuko dute neguaren iristea. Bat egingo dute San Juan ospatzen inguruko hainbat euskal etxerekin. Udazken luze-luze baten ostean, azkenean hotza iritsi da munduko bazter honetara eta Gral. Las Heraseko Zazpirak Bat eta Cañuelas-eko Denak Bat euskal etxeek ongietorria emango diote, San Juan suaren aspaldiko magia gaur egunera ekarriz. Hitzorduak ekainaren 22an (Gral. Las Heras-en) eta ekainaren 29an (Cañuelasen) izango dira eta bi festetan sorgina erretzearekin batera, Euskal Herriko dantzak eta kantak eskainiko dira. Erritua bukatzean, afaria bana eskainiko dute erakundeek.
2013/06/18
Entzun daitekeen hiztegi bat da Ahozko Hiztegia, tresna baliagarria zalantzarik gabe hitzak nola ahoskatu behar diren ikasi nahi duenarentzat. Azkue Fundazioa eta Bizkaiko Foru Aldundia laguntzaile, Euskarazko Ahozko Hiztegia ipini da orain sarean, euskara batuan hitzak zelan esaten diren argitzen diren doaniko tresna. Laukian, topatu nahi duzun hitza sartu eta entzuteko ikonotxoan sakatuz ahots batek hitza irakurriko dizu. Egin zazu aproba.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
