euskal diaspora eta kultura
2013/09/26
Gure Txokoa Euskal Etxeak antolaturik, 'Córdoba Canta Loyola' (Cordoba Loiolari kantari) Kantu Topaketaren XXII. edizioa burutuko da bihar, hiru abesbatza argentinar partaide. Euskal santuaren omenezko emanaldia iluntzeko 8etan hasiko da, hiriko Nuestra Señora de la Merced Basilikan. Datorren hilabeteari begira, beste gonbite bat luzatzen dute Gure Txokoa-koek: Cordobako Unibertsitate Katolikoak urriaren 17an antolatuko duen Ikaslearen Nazioarteko Eguneko ospakizunean euskal gizataldea ordezkatuko dute dantzak eta stand kultural batekin.
2013/09/25
Argentinarako emigrazioaz arduratzen diren Frantziako elkarteen bilkura antolatu du helduden asteburu honetan Euskal Argentina elkarteak. Euskal Herri Iparraldean egoitza duen elkarte honek honek deiturik, Ameriketarako emigrazioarekin zerikusia duten sei elkarte bilduko dira larunbat eta igandez Donibane Garazi eta Nafarroa Beherean, elkar hobeto ezagutu eta elkar laguntzeko. Bigarren aldiz egiten dira jardunaldiak, 2011ean Aveyron-en antolatu baitziren. "Pena dugu Hegoaldean ez baita gure pareko elkarterik eta biziki plazer genuke halako bat sor baledi" adierazi dio jardunaldion antolatzaile eta Euskal Argentinako lehendakari den Monika Legartok EuskalKultura.com-i.
2013/09/25
Aurreko edizioetako festek lagun andana bildu dute eta aurtengoan ere horrela izatea espero dute VascosMexico taldekoek. Hamar urte igaro dira talde hau abian jarri zenetik --posta zerrenda gisa sortu zen, 2003ko urriaren 10ean-- eta harrezkero Mexikoko euskaldunen topagune birtuala bilakatu da. Orain, hamarkada honetan egindako lagunak biltzeko jai handia antolatu du taldearen sortzaile eta sustatzaile nagusiak, Jaione Arrieta Galarragak. urriaren 19an izango da, Mexiko DFko Alaia jatetxean eta 200 lagunentzako lekua baino ez dago. Bertan izan nahi duenak, izena eman beharko du lehenbailehen!
2013/09/25
Ontarioko Euskal Etxeak egitarau mardula prestatu du aurten Mikel Deunaren eguna ospatzeko eta dena gertu dauka jaia eta euskal giroa ekartzeko Oregon estatuko herri honetara igandean. Euskal Herritik gonbidatu bereziak egongo dira bertan, Kalakan taldeak kontzertua eskainiko baitu. Taldea AEBetan barrena bira egiten ari da egunotan, iazko urte osoa eta aurtengo erdia Madonna kantariarekin munduan zehar ibili ostean. Horrez gain, beste hamaika ekitaldi egingo dira Ontarion: meza, prozesioa, herri kirol erakustaldiak eta euskal gastronomia dastaketak.
2013/09/25
Ekintza ugari antolatu ditu datozen hilabeteetarako Buenos Aires probintzia argentinarreko ‘Villegasko Euskaldunak’ euskal etxeak. Batzuk ohikoak eta beste batzuk proposamen berriak, gonbidatu berezien eskutik. Datorren larunbatean, irailaren 28an, esaterako, Pintxo Lehiaketa egingo du, La Platako Lazkao Tabernako Jose Boccardo chefa epaimahaikide. Urriaren 4an burutuko den mintzaldia, berriz, Norma Riosek eskainiko du hiriburuko Iparraldeko Euskal Etxearen izenean. Bestetik, eta egoitza berriaren zorua amaitzeko, Laguntza Bonoak jarri ditu salgai Gral. Villegaseko euskal etxeak.
2013/09/24
Ez dago Estatu Batuetako mapetan, baina joan den larunbatean egon zitekeen, eskubide osoz. Donibane Garazi ehundaka euskal amerikanoen biltoki bilakatu zen larunbat egun osoan, Euskal Artzainak Ameriketan elkarteak deiturik antolatzen den honelako zortzigarren hitzorduan. Euren bizitzetako parte bat AEB Mendebalean artzain pasatutakoek elkarretaratu eta kontu kontari ibili ahal izan zuten, aspaldi ikusi gabeko lagunak agurtuz eta elkarren berri banatuz. Emozioa eta egitate euskal-amerikarraren aldarri isila izan ziren, beste behin, egunaren ardatzak.
2013/09/24
Egun batzuetako kontua baino ez da izango, baina iragan igandetik eta bihar arte euskaldunen ondorengo bat, Aurelio Iragorri Valencia, izango da Kolonbiako presidente. Iragorri Kolonbiako Barne Ministroa da egun eta, Santos presidentea AEBetan bidaia ofizialean dagoen bitartean, haren funtzioak hartu ditu bere gain. Kolonbiatik eman digute honen berri Iragorri familiako zenbait kidek. Politikarako joera ei dago sendi honetan, eta Iragorriren aita, Aurelio Iragorri Hormaza, senadorea da (eta Bogotako Euskal Etxeko kidea). Amaren aldetik ere badatorkio politikari sena, bere aitona, Guillermo Leon Valencia, Kolonbiako presidente izan baitzen.
2013/09/24
Aurten ere bilduko dira Argentinako euskal etxeetako gaztetxoak FEVAk antolatutako Ume Topaketan. Jaialdiaren XVI. edizioa goiz-goizetik hasiko da ordezkaritzen harrerarekin eta arratsaldean zehar luzatuko da jolas, txapelketa, musika eta dantzekin. ‘Agur’ esateko momentuan, Eusko Kometak aireratuko dituzte ume eta laguntzaileek eta norberaren euskal etxeko oroigarriak eskuratuko dizkiote elkarri. Topaketa datorren larunbatean, irailaren 28an, izango da, Llavallolgo Euskal Echea Eskolan eta 4 eta 15 urte arteko umeei dago zuzenduta.
2013/09/23
Amaitu da 2013ko Gaztemundu eta etxean dira dagoeneko trebakuntza ikastaro honetan parte hartu duten Diasporako 15 lagunak. Euretako asko laster hasiko dira baliatzen egunotan landutakoa eta euskal musika tresnak jotzen irakasten euren euskal etxeetako bazkideei: txistua, panderoa, alboka, trikitixa... Euskal Herrian eman dituzten bi asteak bizi-biziak izan dira: klaseak, entseguak, emanaldiak, bidaiak, lagunak... Nola laburbildu hainbeste bizipen? Jarraian, Gaztemundu 2013ko argazki kronika, Kanpoan den Euskal Komunitatearentzako Zuzendaritzak utzitako irudiei esker.
2013/09/23
Buenos Aires hiriak Immigrantearen Eguna ospatu zuen atzo eta hirurogei bat gizatalde izan ziren festako protagonista. Jaialdia Tres de Febrero Parkean burutu zen, hiriko Planetario ondoan, eta zenbait proposamen gastronomiko eta kultural eskaini zitzaizkion publikoari eguerditik iluntzera. Buenos Aireseko euskal kolektibitateak ez zion hitzorduari huts egin eta beste hainbat banderarekin batera ikurrinaren koloreak ikusi ahal izan ziren taula zein standetan. Bi erakundek ordezkatu zuten Euskal Herria: Ekin Dantzari Taldeak eta Laurak Bat euskal etxeak.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
