euskal diaspora eta kultura
2013/11/26
Caracaseko Eusko Etxeak Koldo Meabe, Maite Uzkanga eta Marilo Bilbaoren arimen alde eskainiko du datorren igandean, abenduaren lehenean, egingo duen hilabeteroko meza. Hiruak azaro honetan zendu dira Chiurgua, Euskadi eta Caracasen, hurrenez hurren. Gabonak gero eta hurbilago daudenez, Euskadin bizi den komunitate euskal-venezuelatarretik iragarri dute posible dela Bilbon 'hallaca' tradizional vcaracastarrak lortzea, Adrianak eta Mikelek eginik.
2013/11/26
William Douglass antropologo estatubatuarra Euskal Herrian izango da abenduan, Durangoko Azokako Argizaiola saria jasotzeko. AEBetan euskal kulturaren alde egindako lanarengatik jasoko du aintzatespen hori Renoko Center for Basque Studies zentroko sustatzaile eta zuzendariak. Bidenabar, bi hitzaldi emango ditu Euskal Herrian. Aurrenekoa abenduaren 4an izango da, Deustuko Unibertsitatean egingo den Diasporari buruzko jardunaldien baitan, Unibertsitatea eta Bizkaiko Foru Aldundiak antolatuta. Bigarrena, abenduaren 5ean, Gasteizko Euskal Herriko Unibertsitatearen kanpusean, Migrazioei buruzko Ikerketa Mintegien 2. seriearen baitan.
2013/11/25
Erromako Asociazione Culturale Euskara elkarteak eta UPTER unibertsitateko Euskara Sailak antolatuta, abenduaren 3tik 7ra Settimana Basca jaialdiaren edizio berri bat egingo da Italiako hiriburuan. Euskararen Nazioarteko Egunean abiatuko dira ekitaldiak, "Gartxot" animazio filmaren emanaldiarekin. Ondoko egunetan, Erromako abendu hotza berotuko duten beste zenbait ekitaldi egingo dira: Harkaitz Canoren "Filo d'Erba" liburuaren aurkezpena, "Gazta zati bat" dokumentalaren emanaldia, pintxo dastaketak eta Joseba Tapia eta Luis Fernandezen kontzertua.
2013/11/25
Euskara eta Euskal Kultura nazioarteko unibertsitate esparruetan zabaltzeko helburua daukaten egitasmoen baitan, Etxepare Euskal Institutuak bi irakurle hautatzeko prozesua abiatu du, izan ere Argentinako La Platako Unibertsitate Nazionalean; eta Hungarian, Budapest-eko Eotvos Lorand eta Szeged-eko Unibertsitatean. La Platan, martxoaren lehenaren aurretik beharko du sartu; eta Budapest eta Szeged-en, urtarrilaren 15aren aurretik. Hautagaiek abenduaren 21aren aurretik beharko dute aurkeztu euren proposamena, emailez edo Etxepareren egoitzan, besteak beste.
2013/11/25
Larunbatean eman zion hasiera Argentinako hiriburutik 80 kilometrora dagoen Gral. Las Heraseko Euskal Etxeak 'Urte Amaierako eta Herri Kirolen Festari'. Baina bertako Zazpirak Bat euskal elkarteak antolatzen duen ekimen honek, kirolak ez ezik, Mus Txapelketa eta musika eta dantza ikuskizuna ere bildu ditu jaialdiaren programa barrura. Nobedade gisa, aurreko bi edizioetako bazkari nagusia, euskal etxearen egoitza berrian gauzatuko dela aurten. Hori abenduaren 1ean, festaren azken egunean.
2013/11/22
Oraindik bi urte falta dira Boiseko Jaialdi euskal festaren hurrengo ediziorako, baina Idahon lanean hasiak dira dagoeneko, ordurako dena gertu egon dadin. AEBetako euskal etxe guztietako lagun andana bildu ohi da, bost urtero Jaialdira, eta horiekin batera Euskal Herriko eta Diasporako bisitariak ere izaten dira bertan. Hurrengo edizioan, esaterako Euskal Herriko lau taldek parte hartuko dute. Nortzuk diren jakin nahi al duzu? Jarraian, Jaialdi 2015eko kartela osatuko duten taldeei buruzko datu gehiago.
2013/11/22
Euskal etxearen sortze prozesuan parte hartu zuten lau kide omendu zituen Gure Ametza Euskal Etxeak bazkide helduenen lana eta engaiamendua nabarmentzeko helburua izan zuen zeremonia batean. Ekintza berean, Edurne Bilbao izenarekin bataiatu zuten euskal etxekoek euren egoitzako sukaldea. Jardunbide luzea duten lagunekin batera, ‘etorkizuneko belaunaldien haziak diren txikiek’ ere jaso zuten diploma bana. EuskalKultura.com aktibitatearen lekuko eta baita protagonista ere izan zen.
2013/11/21
Urtero legez Eusko Ikaskuntzak Euskararen Nazioarteko Egunaren ospakizunarekin batera ENE saria emango du, munduan zehar euskara zabaltzen aparteko lana egiten duen elkarte bat aintzat hartuz. Edonork aurkez ditzake hautagaitzak, elkarteak saria zergatik merezi duen azalduz eta arrazoituz testu labur batean. Hautagaiak aurkezteko epea astelehenean bertan amaituko da; beraz, horrelako elkarte bat ezagutzen baduzu, bizkor ibili!
2013/11/21
Argentina Nazioko Kultur Idazkaritzak eta Galiziako Xuntak antolaturik, Atlantikoko Kultur Industrien Lehenengo Merkatua Konpostelako Santiagon egingo da datorren larunbatetik azaroaren 26ra arte. Ekitaldiak Argentina eta Iberiar Penintsulako ekoizle eta enpresari kulturalak bilduko ditu eta ekintza programa trinkoa eskainiko die interesatuei. Bigarren egunean, Etxepare Euskal Institutuaren helburu eta lan lerro nagusiak aurkeztuko ditu eta telebistako plataformei buruzko mahai-inguru bat moderatuko Institutuko zuzendari Aizpea Goenagak.
2013/11/20
Madrilgo Konplutense Unibertsitateko Euskara Sailak, Etxepare Euskal Institutuaren sostenguarekin, Penintsula Iberiarreko Eleaniztasunari buruzko bigarren mintegia antolatu du. Eleaniztasuna gizartea aberasten duen kultura ondarea dela erakustea da mintegi honen helburua eta saioak azaroaren 25 eta 26an egingo dira. Euskarak tartea izango du bertan, bi hitzaldirekin: batean, Euskadiko eta Nafarroako hizkuntz politikak aztertuko dira eta bestean, euskaraz egiten den antzerkia. Mintegiaren aurkezlea Kike Amonarriz hizkuntzalari eta umorista izango da.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
