euskal diaspora eta kultura
2014/02/26
Pozik agertu dira Bartzelonako Euskal Etxeko arduradunak euskal zinearen alde eginiko apustuak izan duen harrera onarekin: aurten elkartearen zine jaialdiak pantaila handira egin du jauzi, eta 1.200 ikusle bildu dira orotara Girona zinemetan egin diren emanaldietara. "Bai euskaldunen aldetik eta baita katalanen aldetik ere interes handia izan dela ikusi dugu" esan dio EuskalKultura.com-i Ekaitz Garate jaialdiko arduradunak. "Azken egunean, 'Asier eta biok' dokumentalaren emanaldian, adibidez, aretoa bete eta ikusle batzuk kalean gelditu ziren. Hori ikusita filma berrestreinatu egingo dute aste honetan Girona zinemetan".
2014/02/26
Buenos Aires Handiko Quilmes herrian jaioa zen Chalo Agnelli irakasle eta historialaria. Idaztea gustuko du Quilmeseko Euskal Echea-ren sortzaileetako baten biloba den Agnellik eta liburu batzuk argitaratu ondoren interneti ere ekin dio. Bere lanak oso harrera ona izan du eta 2009tik hona El Quilmero izeneko bere blog-a elikatzen du. Hiriaren historia azaltzen duten anitz artikulu biltzen dituen web orrian euskaldunak ez dira kanpoan geratu: hona hemen euskal jatorrizko immigranteei buruzko bere artikuluaren laburpena.
2014/02/25
Eusko Jaurlaritzak atzo argitaratu zuen 2013ri dagokion euskal etxeentzako dirulaguntza deialdiaren ebazpena. Bertan ageri da laguntza hauek jaso dituzten euskal etxeen zerrenda, eta baita, arrazoi bat edo beste dela medio, ezezkoa jaso dutenena ere. Orotara 88 euskal etxe eta elkartek aurkeztu zuten eskabidea eta horietatik 54k jaso dute laguntza. Jarraian, ebazpena eta zerrenda.
2014/02/25
Ez zaio sobera falta Arrecifeseko Euskaldunak Denak Bat-i ehun urtetik gorako Argentinako euskal erakundeen multzoan sartzeko; epe horretan, kultura mantendu ez ezik, zabaldu ere egin du, euskal jatorrizko etorkinak babesteko Buenos Aires probintzian sortu zen instituzioak. Historia luzea da, urratsez urrats egina. Hori ospagai harturik, euren 92. urtemuga ospatzera bildu berri dira euskal etxeko kide eta betiko lagunak. Urtebetetze jaiarekin batera, udan egindako beste ekintzen berri jakinarazi digute euskal elkartetik.
2014/02/24
Boise State University-k euskal ikasleei zuzenduriko doktoretza beka sortu du, unibertsitateko Euskal Ikasketa Programaren eta Idahoko euskal komunitatearen babesarekin. Bekek urtebeteko iraupena izango dute eta ikasleak doktoretza egin ahal izango dute Boiseko Ingeniaritza eta Elektronika arloko sailetan. Bekak matrikula osotasunean ordainduko du eta, horrez gain, ikasleak 18.000 eta 25.000 dolar bitarteko diru-laguntza jasoko du ostatu eta gastuetarako. Eskabideak martxoaren 15a baino lehen aurkeztu behar dira.
2014/02/24
30 urte beteko ditu aurten Joseba Gotzon portugaletetarrak (Bizkaia) kantagintzan eta beste ekintza batzuen artean Argentinako bira batekin ospatuko du apirilaren amaieran. Euskal etxeen eskutik eskainiko dituen kontzertuetan bi helburu izango omen ditu nagusi; batetik, bere errepertorioa birpasatu eta ‘Erotisme’ album berriko kantu batzuk aurkeztea eta bestetik, Xoan Curiel kantautore galiziarrarekin garatzen ari den proiektua ezagutaraztea. Bira apirilaren 24tik maiatzaren 3ra arte luzatuko da eta datak oraindik erabat zehaztuta ez egon arren, San Nicolas, Rosario eta Parana hirietan aurkeztuko dira ziur aski.
2014/02/21
Victor Esain hil da 2014ko otsailaren 16an Fresnon, 80 urte zituela. Fresnon bertan 1933ko ekainaren 6an jaioa, euskaldun petoa zen, bere gurasoek, Felix eta Lyda (Martinto) Esainek Fresnon 1935ean sortu eta kudeatu zuten Basque Hotel ostatuan hazia. Fresnoko Euskal Etxeko sortzaileetakoa, NABOko ordezkaria eta urte askoan Mus arduraduna izan zen. 2004an Society of Basque Studies in America-k bere Pertsonaien Galerian (Hall of Fame) sartu zuen. NABOk Bizi Emankorra saria eman zion 2011ean.
2014/02/21
Argentinako eta Euskal Herriko kostaldeek bat egin dute berriro ere sukaldean. Izan ere, urtarrilaren 4tik aurrera euskal sukaldaritza dastatzeko leku berri bat inauguratu da Buenos Aires probintziako gune turistiko garrantzitsuena den Mar del Platan. Hondarribian trebaturik, jatetxeko jabeek arraina, arroza eta itsaski freskoak eskaintzen dituzte plater nagusi; baina haragi gorria ere badago aukeren artean. Bizigarri jatetxea asteartetik igandera dago irekita, gauez, Mar del Platako Avellaneda eta San Luis kaleen izkinan.
2014/02/21
Euskal kultura eta literatura Italiako Modena hiriko liburu azokara eramando dute asteburuan Itxaro Borda idazleak eta Pantxoa Etxegoin Euskal Kultur Erakundeko zuzendariak. Euskal ordezkaritzak "Il testo infinito" izeneko sorkuntza eta komunikazioari buruzko mahainguru batean parte hartuko du eta Euskal Herriari buruzko argazki erakusketa bat inauguratuko du, besteak beste. Bestalde, bihar Anne Etchegoien kantariak kontzertua emango du "Le Voix Basques" ikuskizuna Italian aurkeztuz.
2014/02/20
Pariseko Eskual Etxeak marka utziko du aurten hiriko Inauterietako desfilean, Lamina eta Basajaun buru dituelarik. Euskal elkarten jo eta ke ari dira lanean azken asteotan euskal kulturaren pertsonaia mitologiko hauen bi figura erraldoi sortzeko. Emeki emeki, forma hartzen hasi dira biak eta datorren martxoaren 2an, igandean; Pariseko kaleetara ateratzeko prest egongo dira, euskal etxeko Gazteria dantzariekin, Gernika koruko kantariekin eta eurekin bat egin nahi duten lagunekin. Hitzordua eguerdiko ordu batetan da, Place Gambettan; zatoz eta disfruta itzazu Pariseko Inauteriak euskal erara!
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
