euskal diaspora eta kultura
2014/03/31
Boiseko Ikastolan irakasle den Maria abadiñoarrari esker sortu da ekimena. Mariak Ander Cimasi kontatu zion ideia, eta honek bere gain hartu zuen ideia eder hori gauzatzeko ardura. "Mariak esan zidanez Ikastolan baserritar jantziak behar dituzte, Gabonak eta Santa Ageda bezalako jaiak umeekin ospatzeko. Euskal Herriko etxe askotan horrelako jantzi zaharrak jasota edukiko zituztela bururatu zitzaigun eta agian norbait horiek ematera animatuko zela", azaldu du Anderrek. Biltzen diren arropak Boisera bidaliko dituzte eta han Ikastolako neska-mutilek urtero urtero erabiliko dituzte.
2014/03/31
‘Zavaleteada’ da bilerari familiak paratu dioten izena eta bere bosgarren edizioan 250 bat partaide bildu ditu Buenos Aires probintzian joan den martxoaren 23an, Argentina osotik eta Mexikotik etorriak. Topaketa Ramallo hirian burutu zen eta Soraluzen jaio eta XIX. mendean Argentinara emigratu zuten Bartolome, Agustin, Josefa, Antonio eta Jose Maria de Zavaleta anai-arreben zenbait belaunaldi bildu zituen. Ondo baino hobeto baliatu zuten eguna elkarren berri izan eta informazioa eguneratzeko; bazkari ederraz eta dantza eta musikaz ere gozatu zuten. Kopak altxatzeko momentuan, "gure artean jadanik ez daudenak" ere ekarri zituzten gogora.
2014/03/28
Gaur duzu azken eguna EuskalKultura.com-en martxoko zozketan parte hartu ahal izateko. Hona zozketagai ditugun sari ederrak, hiru liburu eta DVD bat: euskaraz, Diasporaren eta euskal emigrazioaren lekukotasun zuzena ematen duen 'Urruneko mendebalean artzain', Mattin Etchamendyren liburua; ingelesez, Pedro Oiarzabalen 'Gardeners of identity', San Frantziskoko euskal komunitateaz; gaztelaniaz, 'Vascos en Buenos Aires' liburua, hiriburu horretako Udalak bertako euskaldunez argitaratua; eta DVD bat, 'Zerutik sua dator', 1937an Bizkaiko zenbait herriren bonbardaketen lekuko izan zirenen hitzarekin.
2014/03/28
Bartzelonako Euskal Etxea biltoki eta anfitrioi izango da datorren asteburu honetan Europa-Asia (larunbatean) eta Espainiako Estatuko (igandean) euskal etxeei dagokienean. Ingalaterra, Txina, Italia, Belgika, Frantzia, Espainia, Alemania eta Australiako euskal elkarteen ordezkariak larunbatean batuko dira Euskal Mundu-Kongresu arteko eskualde-bilera batean, Eusko Jaurlaritza antolatzaile eta Marian Elorza Kanpo Harremanetarako idazkari nagusia eta Asier Vallejo Kanpoko Euskal Komunitatearentzako zuzendaria buru. Igandean, berriz, Espainiar Estatuko euskal etxeak bilduko dira, euren urteroko batzarrean.
2014/03/28
La Platako Euzko Etxea-ko Zuzendaritza Batzordeak baieztatu duenez, Buenos Aires probintziako hiriburua izango da 2014 honetan Euskal Aste argentinarraren egoitza. Elkarretaratzea azaroaren 2tik 9ra bitartean burutuko da, bertako euskal etxearen 70. urtemugaren programa barruan antolaturik, urtean zehar garatuko diren beste hainbat ekintza bezala. Voucherren prezioak, aste osoko programa eta Festan hartuko duten parte artisten zerrenda konfirmatu ahala adieraziko dira.
2014/03/27
Apirila euskal kulturaz gozatzeko makina bat aukerarekin jantzita dator aurten Boisera, Basque Museum and Cultural Center-ek eta euskal komunitateak antolatu dituzten ekimenei esker. Besteak beste hauek izango dira: Cyrus Jacobs/Uberuaga euskal ostatu historikoa doan ikusteko aukera, Amuma Says No taldearen kontzertua Leku Onan, Annual Benefit Dinner and Auction jaia, euskal dantza ikastaroa eta "Berbetan" hitzaldi sailean Mari Carmen Totoricak Gernikako bonbardaketaren lekukotasun zuzena emango du.
2014/03/27
Euskal Azokaren bigarren edizioa egingo du datorren apirilaren 5ean New Yorkeko Euzko Etxeak. Elkarteak bazkideei hainbat euskal ekoizle eta artisauei euren produktuak zuzenean erosleei eskaintzeko aukera emango die. Besteak beste Izaskun Zabala diseinatzailearen bitxiak jarriko dira salgai azoka honetan. Merkatuarekin batera arrain merkatu bat ere egingo da, MMMediterranean Seafood Co. enpresaren lankidetzari esker. Bihar afari bat egingo da Euzko Etxean arrain azokako produktuak dastatzeko.
2014/03/27
Euskadiren Argentina eta Mercosur-erako Ordezkari Sara Pagolak Hegoalde Argentinarra euskal etxea bisitatu du joan den asteburuan, Santa Cruz probintzia australean. Euskal elkarteko Cesar Arizmendi lehendakariak eta bertako euskal komunitateko zenbait kidek errezibitu zuten Pagola, baita ere, bakoitza bere herrian, Comandante Luis Piedrabuena-ko alkate Jose Ramon Bodlovic-ek, eta El Calafate-ko alkate Javier Bellonik.
2014/03/27
'Estellés euskaraz' liburura, jatorriz valentzieraz ziren bere poemak euskarara ekarriz omenaldia egin zioten iaz Valentziako Vicent Andrés Estellés poetari (1924-1993) eta liburuak aurkezpen elebidunak izan ditu geroztik Valentziar Erkidegoan zein Euskal Herrian. Gerardo Markuleta euskaratzaile, Bostezo etxea argitaratzaile, liburuko testuekin aurkezpen zikloko azken saioa egingo da gaur arratsaldean, Valentzia hirian, partaide, besteak beste, Quart de Poblet-eko Euskaltzaleok Valentzia euskal etxeko kideak.
2014/03/26
Txistua munduan zehar ezagutzera ematea da Garikoitz Mendizabal zestoarraren ametsa, eta bide horretan da, "Txistu Symphonic" izeneko diskoa grabatu eta gero. Disko horretan txistua orkestrarekin lagunduta jo daitekeela erakutsi zuen eta lan horrek nazioartean kontzertuak emateko atea ireki dio. Hego Koreako ateak, esaterako: itzuli berria da handik, bost kontzertu eta ostean, harrerakin kontent. "Musikak badu desberdinen arteko zubiak eraikitzeko ahalmena eta euskal kulturak bere osotasunean asko du kanpoan eskeintzeko. Hau guztia txistuaren eskutik egin daitekeelakoan nago modu erraz eta dotore batean", esan digu berak.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
